लण्डनमा गजलसाँझ तयारी, गजलकारद्वय प्राञ्जल र थापा मुख्य आकर्षण

लण्डन । मोतीजयन्तीको अवसरमा लण्डनमा ‘गजलसाँझ’ हुने भएको छ । एनआरएनए, युकेको भाषा साहित्य विभागले युवा कवि एवं प्रसिद्ध गजलकार मोतीराम भट्टको संस्मरण गर्दै पहिलोपल्ट भव्य रूपमा गजलसाँझ आयोजना गर्न लागेको कार्यक्रम संयोजक कृष्ण भट्टले बताए । 

सेप्टेम्बर ९, आइतबार लण्डनको साउथ हयारोस्थित ‘हयारो बरो फुटबल क्लब’ मा आयोजना हुने कार्यक्रममा गजलवाचनका निम्ति नेपालबाट प्रसिद्ध गजलकार रवि प्राञ्जल र करुण थापा बेलायत आउन लागेको आयोजक समिति सदस्य लक्ष्मी राई ‘लारा’ ले जानकारी गराइन् ।

प्राञ्जल र थापाले कार्यक्रममा १०-१० वटा गजल वाचन गर्नेछन् । ‘नखुलेको आकाश खुलेर आयो’ भन्ने रवि प्राञ्जलको प्रसिद्ध गजल पनि उक्त कार्यक्रममा वाचन हुनेछ । 

कार्यक्रममा डा. रूपक श्रेष्ठ, नारायण गाउँले, नृपेश उप्रेतीलगायतका केही स्थानीय गजलकारले पनि गजलवाचन गर्नेछन् । प्रसिद्ध गायिका शर्मिला बर्देवा र गायक प्रमोद राज न्यौपानेले गजल-गायनसमेत प्रस्तुत गर्नेछन् । 

अपरान्ह ४ बजेबाट सुरु हुने उक्त गजलसाँझको प्रमुख आतिथ्य बेलायतका निम्ति नेपाली राजदूत डा. दुर्गाबहादुर सुवेदी (दुबसु क्षेत्री) को रहनेछ भने समाजका प्रतिष्ठित व्यक्तिहरूको श्रोताका रूपमा उपस्थिति रहने विश्वास गरिएको छ । कार्यक्रमको प्रवेश शुल्क १५ पाउण्ड राखिएको छ ।  

कार्यक्रमका लागि शिक्षाकर्मी एवं समाजसेवी कृष्ण भट्टको संयोजकत्वमा नारायण गाउँले, नृपेश उप्रेती, लक्ष्मी ‘लारा’ राई र कृष्ण तिवारी सम्मिलित एउटा आयोजक समिति गठन गरिएको छ ।

आयोजक समितिले कार्यक्रममा उपस्थित भएर मनोरञ्जनका साथ साहित्यको सम्बर्द्धनमा योगदान पुऱ्याउन बेलायतवासी समस्त नेपालीलाई आग्रह गरेको छ ।