शुक्रबार, मंसिर १९ २०७७ | Fri, December 04, 2020
नेपालको समय: २३:२७ | UK Time: 17:42

स्कटल्याण्डमा पराजितलाई नै संयोजक बनाउने 
तयारीपछि तीव्र विवाद

वीनेपाली
२०७५ साउन १० गते १८:०८

तस्विर शिव भण्डारी

लन्डन । गैरआवासीय नेपाली संघ बेलायतले स्कटल्याण्ड राज्य समन्वय परिषद् संयोजकमा भोला खनाललाई नियुक्ति 
गर्ने तयारी गरेपछि तीव्र विवाद भएको छ ।

गत वर्ष एनआरएनए यूके निर्वाचनमा उपाध्यक्षमा उम्मेदवारी दिएर पराजित खनाललाई संयोजक बनाउने एनआरएनए यूकेको चाहना विवादकै कारण रोकिएको छ ।

एनआरएनए यूकेले क्षेत्रीय अवधारणा अघि बढाउंदै आयरल्याण्ड र वेल्स् राज्य समन्वय परिषद गठन गरेपनि स्कटल्याण्डमा भने 
संघलाई असफलता हात लागेको छ ।

एनआरएनए यूके अध्यक्ष योगकुमार फगामीसहितको एक टोली सोमबार स्कटल्याण्ड पुगेर रातभर सहमति प्रयास गरेपनि सहमतिमा पुग्न नसकेको महासचिव आरके त्रिपाठीले बताए ।

परिषद् संयोजक पद दावी गर्नेमा गत वर्ष एनआरएनए यूकेको निर्वाचनमा उपाध्यक्ष पदमा पराजित भोला खनाल तथा स्कटल्याण्डका यज्ञमुर्ति ढकाल र मोहन कार्की छन् । केही हप्ता भित्रै बस्ने एनआरएनए यूके केन्द्रीय समिति र उम्मेदवारको रोहवरमा सहमतिको अन्तिम प्रयास गर्ने वा घोषणा गर्ने भन्ने बारेमा कार्यसमितिमा एक मत हुन सकेको छैन् ।

स्रोतका अनुसार खनालको संयोजकत्वमा गठन गर्न लागिएको परिषदमा अध्यक्ष पदका आकांक्षीलाई उपाध्यक्षमा झारिएको छ । जसमा चार जना उपाध्यक्ष बनाउन लागिएको छ । प्रस्तावित उपाध्यक्षमा यज्ञमुर्ति ढकाल, मोहन कार्की, जोनी पहारी र काशीराम भण्डारी छन् ।

सचिवमा कृष्ण दाहाल, सहसचिवमा दिवाकर पाण्डे, कोषाध्यक्षमा धनबहादुर केसी र सहकोषाध्यक्षमा यदुमणि सापकोटा छन् । बांकी उम्मेदवारहरुलाई सदस्य बनाइएको छ । एनआरएनए यूके उपाध्यक्ष ललित न्यौपानेको संयोजकत्वमा गठित राज्य समन्वय विभागको सिफारिस पारित भएमा १३ सदस्यीय समितिबाट बढेर २१ सदस्यीय परिषद गठन गरिनेछ ।

राज्य समन्वय विभाग संयोजक न्यौपानेले सबैको सल्लाहका आधारमा कार्यसमिति समक्ष स्कटल्याण्ड राज्य परिषद् गठनका लागि सम्पूर्ण कार्यसमिति बनाएर सिफारिस गरिएको बताए ।

गत सोमबार स्कटल्याण्डको नमस्ते सिम्ला रेष्टुरेन्टमा सम्पन्न भेलामा परिषदको संयोजकमा तीनै जनाले दाबी नछाडेपछि एनआरएनए यूके टोली रित्तो हात लन्डन फर्किएको थियो ।

उम्मेदवारहरुबीच सहमति निर्माणको प्रयासका लागि एनआरएन केन्द्रीय उपाध्यक्ष कुल आचार्य, यूके अध्यक्ष योगकुमार फगामी, उपाध्यक्ष तथा राज्य समन्वय विभाग संयोजक ललितकुमार न्यौपाने, उपाध्यक्ष प्रेम गाहा मगर र महासचिव आरके त्रिपाठी सम्मिलित एक विवाद समाधान उपसमिति गठन गरिएको थियो । उम्मेदवारले टसमस नगरेपछि उपसमितिले काम गर्न सकेन् ।

यसअघि तदर्थ समिति गठनका लागि एनआरएन यूकेका सल्लाहकार डा राम अधिकारीको संयोजकत्वमा गठित निर्वाचन समितिले उम्मेदवारी दर्ता प्रक्रिया अघि बढाएको थियो । तर, सहमतिको प्रयाससंगै निर्वाचन प्रक्रियाको तयारी गर्न नसकेपछि केन्द्रीय समितिले निर्णय गर्ने गरि स्थगित गरियो ।

यसैबीच, अध्यक्षका उम्मेदवार यज्ञमुर्ति ढकालले आफ्नो उम्मेदवारी उपाध्यक्षमा सारिएकोप्रति आपत्ति जनाएका छन् । उनले प्रमुख संरक्षक, संरक्षक, अध्यक्ष र राज्य समन्वय विभागलाई लेखेको पत्रमा राणा शासन शैलीमा उम्मेदवारी परिवर्तन गरेको बताए ।

पशुपति पोखरेलले एनआरएनए यूकेको नेतृत्वले गलत कार्य नसच्चाए निषेधित क्षेत्र घोषणा गर्न वाध्य हुने चेतावनी दिएका छन् । ग्लास्गो नेपाली एसोसिएसनका पूर्व अध्यक्ष डिलु गैरेले पनि एनआरएनए यूकेको कार्यको तीव्र विरोध गरेका छन् ।

प्रतिक्रिया

सम्बन्धित सामाग्री

फेसबुक