लन्डनको रिजेन्टस पार्कमा प्रदर्शनकारी । तस्विर एपी
लन्डन । अमेरिकाको राष्ट्रपति निर्वाचित भएपछि पहिलोपटक बेलायत भ्रमणमा आएका डोनाल्ड ट्रम्पविरुद्ध लन्डनमा हजारौंले प्रदर्शन गरेका छन् । भ्रमणको दोश्रो दिन शुक्रबार केन्द्रिय लन्डन र बेलायतका केही शहरमा दिनभर ट्रम्पविरुद्ध शान्तिपूर्ण प्रदर्शन भयो ।
ट्रम्पलाई रिसाएको बालकका रुपमा चित्रित गरि ३० हजार पाउण्डमा बनाइएको भव्य बेलुन संसद भवन अगाडि उडाएर सार्वजनिक गरिएको थियो । त्यसपछि कयौं प्लेकार्ड बोकेका प्रदर्शनकारीले ट्रम्प नीतिको विरोध गर्दै बेलायतमा उनलाई स्वागत छैन् जस्ता नारा लगाएका थिए ।
सन् २०११ मा लन्डनको हिंसात्मक प्रदर्शनका बेला तैनाथ गरिएकै अनुपातमा प्रहरीहरु परिचालन गरिएको थियो भने भीड नियन्त्रण गर्न सडकमा तीन मिटर अग्लो फलामे बार लगाइएको थियो । यसअघि ट्रम्पको भ्रमण रद्द गराउन माग गर्दै करिब १८ लाख हस्ताक्षर संसदसमक्ष पठाइएको थियो ।
शुक्रबार लन्डनमा व्यापक प्रदर्शन भइरहंदा ट्रम्पले प्रधानमन्त्री टेरेजा मे निवास चेकर्समा आयोजित संयुक्त पत्रकार सम्मेलनमा बेलायत अमेरिका सम्वन्ध अहिलेजस्तो मजवुत र विशेष कहिल्यै नभएको जिकिर गरे । आप्रवासीका कारण ब्रेक्जिट आएको भन्दै ट्रम्पले यो धेरै जटिल अवस्था भएको पनि उल्लेख गरेका थिए ।
यसैबीच, अमेरिकी राष्ट्रपति ट्रम्पले प्रधानमन्त्री मेको योजना अनुसार युरोपेली युनियनबाट बेलायत बहिर्गमन (ब्रेक्जिट) भए संयुक्त राज्य अमेरिका र बेलायतबीच व्यापार सम्झौता हुन नसक्ने बताएको समाचारले तरंग ल्याएको छ । ट्रम्पले बेलायतको लोकप्रिय अखबार ‘सन’ दैनिकलाई ब्रसेल्समा दिएको भनिएको विशेष अन्तरवार्तामा प्रधानमन्त्री मेको ब्रेक्जिट योजना कार्यान्वयन भए अमेरिकाले बेलायत होइन्, युरोपेली संघसंग सम्बन्ध कायम गर्ने टिप्पणी गरेको उल्लेख थियो ।
संयुक्त पत्रकार सम्मेलन अघि ट्रम्प र मे । तस्विर एपी
तर, ट्रम्पले उक्त समाचार गलत भएको जिकिर गर्दै ब्रेक्जिट योजना आफूलाई ठिक भएको बताएका छन् । प्रधानमन्त्री मेले सञ्चारकर्मीमाझ ट्रम्पसंग महत्वकांक्षी व्यापार सम्झौताबारे छलफल भएको र अमेरिका बेलायतसंग व्यापार सम्झौता गर्न इच्छुक भएको बताएकी थिइन् ।
ट्रम्पलाई बिहीबार बेलायती प्रधानमन्त्री मेले ब्लेन्हीम प्यालेसमा विशेष स्वागतसहित रात्रीभोज दिएकी थिइन् । ट्रम्पले भ्रमणका क्रममा बिहीबार रोयल मिलिट्री एकेडेमीको पनि भ्रमण गरे ।
ट्रम्प र फस्ट लेडी मेलानिया शुक्रबार बेलायती महारानीलाई विन्सोर क्यासलमा भेटेपछि सप्ताहन्त मनाउन आफ्नै स्कटल्याण्डस्थित टर्नबेरी गल्फ रिसोर्ट जाने कार्यक्रम छ ।
