लन्डन । सप्ताहन्तदेखि हराइरहेका फोकस्टन केन्ट बस्ने एक जना भूतपूर्व गोर्खा समुद्री किनारमा मृत भेटिएका छन् । शनिबारदेखि हराइरहेका ७७ वर्षीय वृद्ध भक्तबहादुर तामाङलाई लामो खोजीपछि लिज क्लिफ हल नजिक समुद्री किनारमा भेट्टाइएको हो ।
उनी भेटिएपछि आइतबार बिहान ८ बजे प्रहरीलाई खवर गरिएको थियो । उनको मृत्युलाई शंकास्पद रुपमा हेरिएको छैन् ।
परिवारले शनिबार एकबजेसम्म तामाङलाई देखेको थियो । उनको खोजीमा आपतकालिन सेवाका उद्दारकर्मी परिचालन गरिएको थियो ।
तामाङ श्रीमति गौरीमाया, छोरी रेनु र छोरा विपेनका साथ बस्दै आएका थिए । उनका अरु तीन सन्तान नेपालमै छन् ।
धरानबाट सन् २००६ अक्टोबरमा बेलायत आएका तामाङ १२ वर्षदेखि फोकस्टन बस्दै आएका थिए । उनले सन् १९५९ देखि १९७० सम्म ब्रिटिश आर्मीको क्वीन्स गोर्खा इन्जिनियर्समा सेवा गरेका थिए ।
फोकस्टन नेपलिज कम्युनिटीमा समेत आवद्ध तामाङले नेपाली समुदायलाई उल्लेख्य योगदान गरेका थिए ।
