पञ्चासे हर्पनडाँडा समाज युकेको बार्षिक भेटघाट सम्पन्न 

अल्डरसट । पञ्चासे हर्पनडांडा समाज युकेको वार्षिक भेटघाट कार्यक्रम गत शनिबार अल्डरउड लेजर सेन्टर, अल्डरसटमा सम्पन्न भएको छ । अध्यक्ष डमरकाजी गुरुङ र सिनियर मेम्बर प्रेम बहादुर गुरुङले दीप प्रज्वलन गरी कार्यक्रमको औपचारिक उद्घाटन गरेका थिए । अध्यक्षको छोटो मन्तब्यपछि बधाई कार्यक्रम अगाडि बढेको थियो ।

तीनसय भन्दा बढीको सहभागिता रहेको भेटघाट कार्यक्रम सञ्चालन शोभा गुरुङ र प्रकाश गुरुङले गरेका थिए । कार्यक्रमको शुरुमा उपाध्यक्ष देउकाजी गुरुङले ‘सेफ्टी ब्रीफ’ गरे । कार्यक्रम निकै रमाइलो माहोलमा सम्पन्न भयो । बेलायतमा मौसमका कारणले पनि होला, प्राय भेटघाट कार्यक्रम समरमा नै गरिन्छ । वर्षको एक दिन आफन्त भेट्ने, रमाइलो गर्ने र केही च्यारिटीका लागि रकम जम्मा गर्ने राम्रो मौकाका रुपमा पनि भेटघाटलाई लिइन्छ ।

समाजले विशेषगरि आफ्नै गाउंमा आपतविपतका बेला मद्दत गर्दै आएको छ । समाजले अक्षयकोषका लागि १३ लाख रुपैयांभन्दा बढी रकम बेलायतबाट आफ्नो गाउंमा पठाइसकेको छ ।

उक्त कार्यक्रममा पनि अक्षयकोषका लागि श्रीमती विमला र उदय गुरुङबाट २०० पाउण्ड, बीरबहादुर गुरुङबाट १७५ पाउण्ड र प्रेम बहादुर गुरुङबाट १०० पाउण्ड प्राप्त भएको छ ।

कार्यक्रमको राफल ड्रमा १ तोला सुन, १०० पाउण्ड र ५० पाउण्ड क्रमशः पहिलो, दोस्रो र तेस्रो पुरस्कारमा राखिएको थियो । साथै प्रत्येक पुरस्कारसंगै आर्ट स्टुडेण्ट सन्ध्या गुरुङबाट बनाइएको ल्याण्डस्केप पेन्टिङ पनि दिइएको थियो । 
राफल ड्रका पुरस्कारहरु १ तोला सुन मे. देव गुरुङ अनि १०० र ५० पाउण्ड क्रमशः प्रकाश गुरुङ र लाल बहादुर घलेले स्पोन्सर गरेका थिए । राफलबाट उठेको ८८० पाउण्ड पनि नेपालमा रहेको अक्षयकोषका लागि प्रदान गरिने अध्यक्षले जानकारी दिए ।

भेटघाट कार्यक्रमका लागि २८ जना स्पोन्सरहरुबाट ३५०० पाउण्ड प्राप्त भएको थियो भने अक्षय कोषका लागि १ हजार २५५ संकलन भएको संस्थाका कोषाध्यक्ष रवि गुरुङले जनाए ।

कार्यक्रम सफल बनाउन देव घलेले पेय पदार्थ, खुशीमान गुरुङले नाच र पिउने पानी, दिल गुरुङले पीए सिस्टम र अन्य धेरैले नगद स्पोन्सर गरेका थिए । कल्पना गुरुङ र कृष्णा गुरुङले छोराहरुको विवाह सम्पन्न भएको खुशीयालीमा समाजलाई ३०० पाउण्ड दिए । त्यस्तै दल प्रसाद गुरुङले पनि छोरीको विवाह भएको खुशीयालीमा २०० पाउण्ड दिए । अक्सफोर्ड विश्व विद्यालयबाट आर्थिक र राजनीति दर्शनमा स्नातक गरेकी बेलिन्द गुरुङ र पूर्वाञ्चल विश्वविद्यालयबाट स्नातक हासिल गरेकी साझना देवी गुरुङलाई खादा लगाएर वधाई दिइयो । जिसिएसइमा राम्रो ग्रेडिङ ल्याएकी लाजु गुरुङलाई समेत वधाई दिइएको थियो ।

त्यस्तै कार्यक्रममा विवाह बन्धनमा बांधिएका नव दम्पत्तिहरु जिवन र शुष्मा गुरुङ, निरज र सृष्टि गुरुङ, नितु र योगराज गुरुङ, निशा र आत्मजंग गुरुङ, दिपा र सरोज गुरुङलाई फूलको गुच्छा र खादा लगाइ वधाई दिइयो ।

गैरआवासीय नेपाली संघ युकेकी उपाध्यक्ष पुनम गुरुङ र आमा समूह तमु समाज युके अध्यक्ष बिन्दु घले कार्यक्रममा वधाईका पात्र थिए । कार्यक्रममा सार्जेन्ट पदमा बढुवा भएका सुन्दर गुरुङ, फायरवर्क मास्टर तथा तमुधिं युकेका महासचिव कृष्ण गुरुङ र ८० वर्ष पुगेका ६ जना सदस्यहरुलाई खादा लगाएर सम्मान गरिएको थियो ।

बृद्धबृद्धाहरुलाई सिनियर मेम्बर प्रेमबहादुर गुरुङ र अन्यलाई अध्यक्षकी श्रीमती गीता गुरुङले समाजको तर्फबाट बधाई सम्मान गरे । सो अवसरमा विभिन्न नाच प्रस्तुत गरिएको थियो । कार्यक्रम सफल बनाउन धेरैले साथ दिए । अध्यक्ष गुरुङले प्रायोजक र सहयोगी सबैप्रति धन्यवाद दिएका थिए ।

प्रतिक्रिया

सम्बन्धित सामाग्री