‘भूतपूर्व गोर्खाको निधन बिएमडब्लुको त्रुटीका कारण’

लन्डन । ब्रिटेनमा एकजना भूतपूर्व गोर्खा सैनिक नारायण गुरुङको मृत्युबारे छानवीन गरिरहेको एक समितिले उनको निधनका लागि एउटा प्रमुख कार निर्माता कम्पनी बिएमडब्लुलाई दोष लगाएको छ ।

गुरुङको सन् २०१६ को क्रिसमसका दिन बिहान रोयल सरी काउन्टी हस्पिटलमा काममा जांदै गर्दा सवारी दुर्घटनामा निधन भएको थियो ।

बिहान साढे ६ बजेतिर सडकमै रोकि राखिएको बिएमडब्लु कारलाई जोगाउन खोज्दा गुरुङले चलाइरहेको गाडी सडकबाट उछिटिएर एउटा रुखमा ठोक्किन पुगेको थियो । उक्त दुर्घटनामा चार सन्तानका पिता नारायण गुरुङको निधन भयो भने उनीसंगै यात्रा गरिरहेकी उनकी श्रीमति गम्भीर घाइते भइन् ।

स्वर्गीय गुरुङका परिवारले सरी कोरोनर्स कोर्टमा भएको सुनुवाइमा बिएमडब्लु मोटरमा सुरक्षा सम्बन्धि त्रुटीका कारण सो गाडी बाटोमै बिग्रिएको र त्यसबाट जोगाउन खोज्दा गुरुङको ज्यान गएको दावी गरेका थिए ।

बिग्रिएको बिएमडब्लु मोटर रेशम गुरुङले चलाइरहेका थिए । उनी नारायण गुरुङका नातेदार भने होइनन् । उनले यसअघि दुई पटक आफ्नो मोटर स्टार्ट नभएको ‘एए’ भनिने कम्पनीलाई जानकारी गराएका थिए ।

यसअघि सन् २०१३ मा त्यस्तै समस्या देखिएपछि बिएमडब्लु ले अमेरिका, क्यानडा, अफ्रिका र अष्ट्रेलिया जस्ता मुलुकहरुबाट लाखौं मोटर फिर्ता बोलाएको थियो ।

ब्रिटिश सुनुवाइकर्ताले उक्त घट्नाको झण्डै तीन वर्षपछि पनि ब्रिटेनमा चल्ने मोटरमा त्यस्तै समस्या देखिएको भनि बिएमडब्लु कम्पनीको आलोचना गरेका थिए ।