लन्डन । नेप्लिज युथ यूकेको दोश्रो अधिवेशनले धिरज राईको अध्यक्षतामा नयां नेतृत्व चयन गरेको छ ।
गैर आवासीय नेपाली संघ यूकेका उपाध्यक्ष प्रेमगाहा मगरको प्रमुख आतिथ्यमा सम्पन्न अधिवेशनले अध्यक्षमा धिरज राई र उपाध्यक्षमा केशव गुरुङ एवं कुमार थापा (ब्रुस) लाई निर्विरोध निर्वाचित गरेको हो । नयां नेतृत्व चयनपछि पूर्व अध्यक्ष रिचर्ड गुरुङले नयां कार्यसमितिलाई वधाई तथा सफल कार्यकालको शुभकामना व्यक्त गरेका थिए ।
नव निर्वाचित अध्यक्ष राईले प्रतिवद्धता मन्तव्यका क्रममा युवाहरुसंग सहकार्य गरि समाजका विविध क्षेत्रमा काम गर्ने, युवाहरुमा भएको क्षमता, ज्ञान र सीपको सही सदुपयोग गर्दै एक आपसमा सहयोगी भावनाकासाथ अगाडि बढ्ने प्रण गरे । उनले नेपाली तथा स्थानीय संघसंस्थाहरुसंग सहकार्य गर्दै युवाहरुको क्षमता अभिवृद्धि गर्न पहल गरिने समेत बताए ।
कतिपयले युवा पुस्तालाई नकारात्मक दृष्टिकोणबाट हेर्ने गरेको असन्तुष्टि व्यक्त गर्दै अध्यक्ष राईले समाज विकासमा समुदायले युवा परिचालन गर्न आवश्यक रहेको औंल्याए ।
उक्त कार्यक्रममा अफगानिस्तानमा दुबै खुट्टा गुमाएका पूर्व गोर्खा सैनिक हरि बुढा मगर र विनोद बुढाथोकीलाई युवाहरुले सम्मान गरेका थिए । दुवै खुट्टाको घुंडामाथि गुमाएका हरि बुढा मगर मेरापिक जस्तो अग्लो हिमाल चढ्ने संसारकै पहिलो साहसिक विश्व कीर्तिमानधारी युवा हुन् । उनी आगामी वर्ष संसारकै अग्लो शिखर सगरमाथा आरोहणको तयारीमा छन् ।
हरि बुढामगरले देखाएको साहसले संसारमै सम्पूर्ण नेपालीलाई गौरव गर्ने अवसर मिलेको र यसले नेपाल राष्ट्रको नाम संसारमा उंचो भएको भन्दै युवाहरुले बुढामगर नेपाली युवामात्र होइन, संसारकै अपांगताका लागि प्रेरणाको स्रोत बनेको उल्लेख गरेका थिए । बुढामगर राष्ट्रकै एक सच्चा हिरो भएकाले उनलाई हौसला र समर्थन प्रदान गर्न सम्मान गरिएको युवाहरुले बताए ।
सोही अवसरमा बुढामगरले आफ्नो जिन्दगीको प्रेरणादायी तीता मिठा अनुभव र भविष्यमा गर्ने कार्ययोजनाबारे युवाहरुलाई अवगत गराए । बुढामगरको प्रेरणादायी मन्तव्यले युवाहरु एकदमै भावुक देखिएका थिए भने बेला बेला गडगडाहट तालीले हलको रौनक नै पृथक बनेको थियो ।
त्यसैगरि विनोद बुढाथोकीले पनि जीवनमा महत्वपूर्ण प्रेरणादायी काम गरिरहेका छन् । सन् २०१६ प्यारा ओलम्पिकमा सुटिङ टिम पर्सनल इन्सपिरेसन प्रोग्राममा छनोट भइ काम गरिसकेका बुढाथोकी ब्रिटिस एयर गन ओपन च्याम्पियनसीप २०१७ मा सेकेन्ड रनरअप र सन् २०१८ को फष्ट रनरअप विजेता हुन् ।
कार्यक्रममा प्रमुख अतिथी गैर आवसीय नेपाली संघका उपाध्यक्ष प्रेम गाहा मगरले हरि बुढामगरको सगरमाथा आरोहण सफलताको शुभकामना दिंदै नव निर्वाचित कार्यसमितिलाई वधाइ तथा कार्यकालको शुभकामना दिए । उनले एनआरएनए यूकेले आगामी सेप्टेम्बरमा युवाहरुसंगको सहकार्यमा आयोजना गर्न गइरहेको ‘अपाङ सहयोग सांझ’ (डिसएबिलिटी एड इभिनिङ) कार्यक्रमबारे जानकारी गराउंदै रेडिङका कार्यक्रम आयोजक युवाहरुलाई धन्यवाद दिए ।
नव निर्वाचित अध्यक्ष धिरज राईले पनि कार्यक्रम संयोजक केशव गुरुङ लगायत आयोजक युवालाई धन्यवाद दिए । उनले हरिबुढा मगर र बिनोद बुढाथोकीले साहसिक काम गरि समाजमा पुरयाएको प्रेरणादायी भूमिका र योगदानप्रति आभार प्रकट गर्दै शुभकामना दिएका थिए ।
