लन्डन । संयुक्त अधिराज्य सरकारका एसिया तथा प्रशान्त मामिला हेर्ने विदेश राज्यमन्त्री सम्माननीय मार्क फिल्ड नेपाल प्रस्थान गरेका छन् । यही मे ६ र ७, २०१८ मा नेपालको औपचारिक भ्रमण गर्ने कार्यक्रम अनुसार राज्यमन्त्री फिल्ड शनिबार नेपाल प्रस्थान गरेका हुन् ।
नेपालमा तीन तहको निर्वाचन सम्पन्न भई नयाँ संसद र संघीय सरकार गठन भएपछिको संयुक्त अधिराज्य सरकारको उच्च तहमा हुन लागेको यो पहिलो भ्रमण हो ।
विदेश राज्यमन्त्री फिल्डको यो भ्रमणलाई संयुक्त अधिराज्य सरकारले नेपालको संविधानको कार्यान्वयन, लोकतान्त्रिक प्रक्रिया एवं नवनिर्वाचित सरकारको स्वागतका साथै नेपालको विकास प्रयासमा सहकार्य गर्ने प्रतिवद्धताका रुपमा लिएको छ ।
संयुक्त अधिराज्यका लागि नेपाली राजदूत महामहिम डा. दुर्गाबहादुर सुवेदीले मे ३ विहिबार अपरान्ह विदेश राज्यमन्त्री फिल्डसँग शिष्टाचार भेट गरी उनको आसन्न भ्रमणको तयारीबारे जानकारी गराउनुका साथै नेपालको संविधानको कार्यान्वयन स्वरुप स्थानीय, प्रादेशिक र संघीय संसदको निर्वाचन सम्पन्न भई तीनै तहमा निर्वाचित सरकार गठन भई कार्य सुचारु भइसकेको बताए ।
राजदूत डा. सुवेदीले नवनिर्वाचित सरकारले आर्थिक विकास र समृद्धिलाई राष्ट्रिय एजेण्डाका रुपमा अंगीकार गरेको वर्तमान परिप्रेक्ष्यमा दुई सय वर्ष भन्दा लामो घनिष्ट र ऐतिहासिक सम्बन्ध थप प्रगाढ बनाउन र पर्यटन, व्यापार र लगानीका क्षेत्रमा सकारात्मक योगदान पुग्ने विश्वास व्यक्त गरे ।
राज्यमन्त्रीले नेपालको शान्ति प्रक्रिया र लोकतान्त्रिक विकासमा योगदान गरेको संयुक्त अधिराज्यले संविधानको सफल कार्यान्वयनको सराहना गरेको र जननिर्वाचित सरकारले घोषणा गरेको आर्थिक विकासको लक्ष्यमा सहकार्य गर्न संयुक्त अधिराज्य सरकार तत्पर रहेको बताउंदै आफ्नो यो भ्रमण दुई मुलुकबीचको मैत्रीपूर्ण सम्बन्धलाई अझ सुदृढ गर्न र पर्यटन, शिक्षा, व्यापार र लगानीका नयाँ क्षेत्रहरु पहिचान गर्न सहायकसिद्ध हुने विचार व्यक्त गरेका थिए ।
राज्यमन्त्री फिल्डले नेपाल रहँदा प्रधानमन्त्री, परराष्ट्रमन्त्री, पूर्व प्रधानमन्त्री पुष्पकमल दाहाल ‘प्रचण्ड’ लगायत नेपाल सरकारका उच्च पदस्थ अधिकारीहरुसँग शिष्टाचार भेटवार्ता गर्ने कार्यक्रम छ । उनले नेपालको उद्योग, वाणिज्य तथा व्यापारसंग सम्वद्ध पदाधिकारीहरुसंग पनि भेटवार्ता गर्ने कार्यक्रम छ ।
