अल्डरसटमा नेपालीबीच भलिबल प्रतियोगिता हुंदै

लन्डन । अल्डरसटमा नेपाली खेलाडीबीच भलिबल प्रतियोगिताको तयारी भएको छ ।

अल्डरसट नेपलिज भलिवल क्लवले ९ जुन २०१८ का दिन अल्डरसटस्थित कन्नट स्कुल खेल मैदानमा दोश्रोपटक प्रतियोगिता गर्न लागेको हो । यस वर्ष पुरुष १५ र महिला ७ टिमले प्रतिष्पर्धा गर्ने क्लवका अध्यक्ष चन्दन गुरुङले जानकारी दिए । यस पटक टिम सहभागिता बढि हुने भएको छ । गत वर्ष पुरुष १२ र महिला ६ टिमले प्रतिष्पर्धा गरेका थिए ।

पुरुष महिला बेग्लाबेग्लै प्रतिष्पर्धा गराइने र पुरुषतर्फ प्रथम हुने विजेताले एक हजार पाउण्ड एवं दोश्रो विजेताले ६ सय पाउण्ड प्राप्त गर्ने अध्यक्ष गुरुङले बताए ।

त्यस्तै महिला भलिवलतर्फ प्रथम हुनेले चारसय पाउण्ड, दोश्रो हुनेले दुईसय पचास पाउण्ड र तेश्रोले एकसय पाउण्ड 
पुरस्कार पाउने क्लवले जनाएको छ । विजेताले शिल्ड, मेडल र प्रमाणपत्र समेत पाउनेछन् ।

अध्यक्ष गुरुङले खेलकुद मार्फत नेपाली समुदायलाई एकीकृत गरि खेलाडीको सीप र हौसला बढाउन प्रतियोगिता गरिएको बताए । उनले उक्त दिन प्रतियोगितामा सहभागी भएर कार्यक्रम सफल बनाइदिन पनि आग्रह गरेका छन् ।

बेलायतमा फुटबल प्रतियोगिता कयौं भएपनि भलिवल चाहिं बिरलै हुने गर्छ ।

प्रतिक्रिया

सम्बन्धित सामाग्री