लन्डन । एकजना भूतपूर्व गोर्खा सैनिक विष्णु गुरुङ आगामी मेमा हुने स्थानीय निर्वाचनमा पुनः काउन्सिलर पदमा लड्ने भएका छन् । उनी अहिले चुनाव प्रचार प्रसारमा व्यस्त छन् ।
यसअघि काउन्सिलर र डेपुटी मेयर भइसकेका गुरुङ आगामी ३ मे, २०१८ मा हुन लागेको स्थानीय निर्वाचनमा लेबर पार्टीको प्रतिनिधित्व गर्दै हयानवर्थ पार्कबाट फेरि प्रतिष्पर्धा गर्न लागेका हुन् ।
‘म वास्तवमा समुदायसंग काम गर्न उत्सुक र स्थानीय वासिन्दाको जीवनस्तर उकास्न समर्पित रहनेछु’, गुरुङले भने, ‘म स्थानीयलाई विगतमा पनि सहयोग गर्न पाउंदा खुशी भएं । अब फेरि मलाई सबै मतदाताको साथ र सहयोग आवश्यक भएकाले मत दिन अपिल गर्दछु ।’
गुरुङले आफू इमान्दार, परिश्रमी र आवश्यक परेको बेला स्थानीय जनतासमक्ष कुनै पनि बेला पुग्ने प्रण गर्दै जिताइदिन आग्रह गरेका छन् ।
बस चालक गुरुङ पहिलोपटक सन् २०१४ मा काउन्सिलर पदमा निर्वाचित भएका थिए । अर्को वर्ष उनी डेपुटी मेयर भए । ब्रिगेड अफ गोर्खाजमा लामो समय सेवा गरेका उनी गोर्खा नेपलिज कम्युनिटी हन्स्लोका संस्थापक अध्यक्ष हुन् । आर्मड फोर्सेस च्यारिटी (एसएसएफए) को ‘केस वर्कर’ रहेका गुरुङ अन्य धेरै संघसंस्थामा स्वयंसेवी भूमिकामा पनि छन् ।
काउन्सिलर निर्वाचित भएपछि विष्णुले वडामा २० माइल प्रति घण्टा ‘स्पीड लिमिट’ गराउन अहंम भूमिका खेले । वडाभर वृक्षारोपण र पार्क फिल्ड क्रिसेन्ट तथा वरपर माइक्रो सर्फेसिङ, ब्रिज हाउस पोण्ड फेल्थामको स्तरोन्नति गर्न एसोसिएसन स्थापना, सबै समुदायलाई सहभागी गराइ फेल्थाम रिमेम्बरेन्स परेड आयोजना आदि गरे ।
आफ्नो योगदान र अनुभवले पुन काउन्सिलरमा उम्मेदवारी दिएको उनले बताएका छन् ।
