धादिङमा विद्यालय पुनर्निर्माणका लागि तमुधिं यूकेको च्यारिटी डिनर

लन्डन । तमुधिं यूकेले धादिङमा एक विद्यालय पुनर्निर्माणका लागि 
रकम जुटाउन २५ मार्च आइतबार एक ‘च्यारिटी डिनर नाइट’ गरेको छ । धादिङको अति दुर्गम गाउं खादिङमा अवस्थित श्री हिमालय सरस्वती 
प्राथमिक विद्यालय पुनर्निर्माणका लागि आर्थिक सहयोग जुटाउन अल्डरसटस्थित एम्पायर हलमा च्यारिटी डिनर गरिएको हो ।

उक्त विद्यालय भवन सन् २०१५ को महाभूकम्पले क्षतिग्रस्त भएपछि विद्यार्थी पाल टांगेर पढ्न वाध्य छन् । तमुधिं यूकेले पहार ट्रष्ट नेपालको सहकार्यमा उक्त विद्यालय करिब ५० लाख रुपैयां लागतमा पुनर्निर्माण गर्दैछ ।

एनआरएनए आइसीसी उपाध्यक्ष कुल आचार्यको प्रमुख आतिथ्यमा भएको उक्त कार्यक्रममा पहार ट्रष्ट नेपालका अध्यक्ष होवार्ड ग्रीन एमबीइले आफ्नो संस्थाको गतिविधिबारे प्रकाश पार्दै विद्यालय पुनर्निर्माणमा तमुधिं यूकेको अग्रसरताप्रति आभार व्यक्त गरे ।

एनआरएनए आइसीसी उपाध्यक्ष कुल आचार्यले तमुधिं यूकेको सामाजिक तथा मानवीय कार्यको प्रशंसा गर्दै उक्त विद्यालय निर्माणका लागि आफ्नो तर्फबाट एक लाख ५ हजार रुपैयां चन्दा दिने प्रतिवद्धता जनाए ।

कार्यक्रममा तमुधिं यूके अध्यक्ष ज्ञाम गुरुङले दाताहरुप्रति आभार व्यक्त गर्दै सन् २००० मा स्थापित च्यारिटी संस्था तमुधिं यूकेले बेलायतमा तमु भाषा, कला- संस्कृति संरक्षण र संवर्धनमात्र नगरि नेपाल तथा विदेशमा शैक्षिक, खेलकुद, दैवी प्रकोप, स्वास्थ्य, पर्यटन र मानवीय हितका विभिन्न क्षेत्रमा समेत सहयोग गर्दै आएको बताए । तमुधिं यूकेले भूकम्पपछि एनआरएनए आइसीसी मार्फत एक करोड ११ लाख, ११ हजार रुपैयां संकलन गरि नमुना वस्ती निर्माणका लागि हस्तान्तरण गरेको पनि अध्यक्ष गुरुङले जानकारी दिए । त्यसैगरि, तमुधिं यूकेले लन्डनस्थित नेपाली दूतावासलाई १० लाख रुपैयां समेत सहयोग गरेको थियो ।

उक्त संस्थाले इराकमा मारिएका १२ नेपालीको परिवारलाई जनही एक लाख रुपैयां र सप्तरीका बाढी पीडितलाई गत वर्ष एनआरएनए मार्फत १० लाख रुपैयां सहयोग हस्तान्तरण गरेको थियो । तमुधिं यूकेले हालसम्म ७० जना गरिब तथा जेहेन्दार विद्यार्थीलाई छात्रवृत्ति प्रदान गरिसकिएको जनाएको छ ।

तमुधिं यूकेले बेलायतमा वर्षेनी नेपाली मेला र गोर्खा कप जस्ता वृहत इभेन्ट गर्दै आएको छ, जसमा हजारौं नेपाली र विदेशी सहभागी हुन्छन् ।

संस्थाका सचिव तुलाराम गुरुङले सञ्चालन गरेको औपचारिक कार्यक्रममा च्यारिटी डिनर नाइट संयोजक सूर्जे (रामचन्द्र) गुरुङले स्वागत मन्तव्य दिए । अर्का संयोजक एवं सल्लाहकार जुमकाजी गुरुङ, एनआरएनए यूके अध्यक्ष योगकुमार फगामी, भीम गुरुङ लगायतले शुभकामना दिंदै 
संस्थाको सामाजिक कामको खुलेर प्रशंसा गरे ।

सल्लाहकार सूर्य गुरुङ र कल्चरल सेक्रेटरी कृष्ण गुरुङले सञ्चालन गरेको दोश्रो चरणको कार्यक्रममा विभिन्न नृत्य, गायन, राफल ड्र तथा ‘अक्सन’ गरिएको थियो ।

सो अवसरमा स्थानीय गायक गायिका ममता गुरुङ, सपनकुमार राई लगायतले गायन प्रस्तुत गरे । गायिका ममताले स्वागत गीतका रुपमा ‘फूलको आंखामा फूलै संसार…’ गाइन् । ‘अक्सन’ महासचिव कृष्णप्रसाद गुरुङ र राफल ड्र यशोधा गुरुङले सञ्चालन गरेका थिए ।

कार्यक्रमका सहयोगीलाई 
प्रमाणपत्र पनि प्रदान गरियो । तस्विरहरु- मिलन तमु