ब्रेक्जिट बेलायती जनताकै चाहना- प्रधानमन्त्री मे

लन्डन । बेलायती प्रधानमन्त्री टेरेजा मेले बेलायतको यूरोपियन यूनियनबाट बहिर्गमन बेलायती जनताको चाहना बमोजिम गरिएको निर्णय भएको बताएकी छन् ।

तीनदिने चीन भ्रमणमा रहेकी प्रधानमन्त्री मेले आफ्नै दल तथा विपक्षीबाटसमेत उनको नेतृत्व र ‘ब्रेक्जिट योजना’ माथि प्रश्न गर्दै दवाव दिइरहेका बेला मेले आफू अप्रिलमा शुरु भएको बेलायतको इयूबाट बहिर्गमन प्रक्रिया अघि बढाउन लागिपरेको बताइन् । तर, उनले बहिर्गमनपछि कस्तो खालको सम्बन्ध चाहेको भन्ने विषयमा भने विस्तृत बताइनन् ।

तपाईं व्यापारलाई अवरोध पार्ने पक्षमा हुनुहुन्छ वा बेलायतको आफ्नै बाटो तय गर्ने शक्तिको पक्षमा हुनुहुन्छ ? भन्ने प्रश्नमा मेले ‘हाम्रो बीचमा रहेका विकल्पहरू यी होइनन्’ भनिन् ।

‘हाम्रो विकल्प भनेको राम्रो व्यापारिक सम्झौता गर्ने हो’- उनले प्रष्टयाइन् । प्रधानमन्त्री मेलाई कन्जरभेटिभ पार्टीबाट समेत यस हप्ता ब्रेक्जिटबारे प्रष्ट धारणा अघि सार्न दवाव आएको सञ्चारमाध्यमहरूले जनाएका छन् ।

सरकारका आन्तरिक कागजात, जसमा इयूसँगको व्यापार सम्झौताले बेलायतलाई नराम्रो प्रभाव पार्ने मुल्याकंन भएको थियो, चुहिएको थियो र यसले बेलायतमा तनाव थपिएको छ ।

प्रधानमन्त्री मेले भनिन्, ‘बेलायती जनताले ब्रेक्जिटको पक्षमा मतदान गर्नु भनेको बेलायती मुद्रा, सीमाना, कानूनलाई आफ्नो नियन्त्रणमा ल्याउने उद्देश्य थियो र हामीले यही अनुरुप वार्तालाई अघि बढाइरहेका छौं । हामी सीमाभन्दा पर पनि व्यापार गर्न सक्नेकुराको प्रत्याभूत गर्न चाहन्छौं । अहिले वार्ताको थालनी भएको छ । वार्ताको समाप्तिसँगै सम्झौतालाई संसदमा प्रस्तुत गरिने र अत्यधिक मतदानले यसलाई पारित गरिनेछ ।’