बेलायती प्रधानमन्त्री टेरेजा मे
लन्डन । बेलायती प्रधानमन्त्री टेरेजा मेले चीन भ्रमण गर्ने भएकी छन् । मेले आगामी जनवरी ३१ देखि फेब्रुअरी २ सम्म चीन भ्रमण गर्ने तय भएको चीनको विदेश मन्त्रालयका प्रवक्ता हुआ चुङयीङले बिहीबार जानकारी दिएका छन् ।
प्रधानमन्त्री भएपछि मेले पहिलो पटक चीन भ्रमण गर्न लागेकाले भ्रमणलाई उच्च महत्व र अर्थपूर्ण रूपमा हेरिएको छ । भ्रमणका क्रममा द्विपक्षीय हितलगायत क्षेत्रीय र अन्तर्राष्ट्रिय मुद्दाका विषयमा छलफल हुने अनुमान गरिएको छ ।
मेले आफ्ना चिनिया समकक्षीलाई भेट्नुका साथै अन्य उच्च सरकारी अधिकारीहरूसंग पनि छलफल गर्ने बताइएको छ । नियमित पत्रकार सम्मेलनमा प्रवक्ता हुआले उच्चस्तरको भ्रमणले दुई देशको सम्बन्ध थप उचाईंमा पुग्ने विश्वास व्यक्त गरे ।
बेलायती प्रधानमन्त्री मेले चीनको सांघाइ र वुहानको पनि भ्रमण गर्ने तालिका रहेको अधिकारीहरूले बताएका छन् ।
