लन्डन । बेलायतस्थित नेपाली महिलाहरुको एउटा क्रियाशिल संस्था ‘एसियन महिला एसोसिएसन’ (आमा) ले पत्रकार रवि लामिछानेको बाढी पीडित प्रोजेक्टलाई एक लाख ४० हजार रुपैयां प्रदान गरेको छ ।
उक्त सहयोग रकम संस्थाकी महासचिव कल्पना गुरुङ र कोषाध्यक्ष सन्जु श्रेष्ठले नेपालमा एक कार्यक्रमबीच पत्रकार लामिछानेलाई हस्तान्तरण गरेका हुन् ।
संस्थाले गत वर्षको तीज कार्यक्रममा राफल ड्रबाट संकलित रकम नेपालमा बाढी पीडितका लागि दिने निर्णय गरे बमोजिम बाढी पीडितका लागि घर बनाउने प्रोजेक्टको नेतृत्व गरिरहेका लामिछिनेलाई सहयोग दिइएको हो ।
आमाकी अध्यक्ष अमिता बेल्बासेको अध्यक्षतामा बसेको कार्यसमिति बैठकले उक्त निर्णय गरेको थियो ।
एसोसिएसनले हरेक वर्ष तीज कार्यक्रमबाट संकलित रकम नेपालमा सक्रिय माइती नेपाल, रक्षा नेपाल जस्ता संस्थालाई दिंदै आएको छ । संस्थाले बेलायतस्थित शिव कल्चर एण्ड कम्युनिटी सेन्टर लगायत विभिन्न च्यारिटेबल संस्थालाई समेत सहयोग गरेको छ ।
आमाले नेपाली कला संस्कृतिको संरक्षणका लागि हरेक वर्ष बेलायतमा वृहत तीज कार्यक्रम गरि समस्त महिलाहरुलाई यहांको परिवेशबारे सुसुचित गराउनुका साथै थप जागरुक बनाउन प्रयत्न गरिरहेको छ ।
संस्थाले हरेक वर्ष नारी दिवसमा विभिन्न निकायका व्यक्तित्वहरुलाई निम्त्याई ‘इन्फरमेसन डे’ को रुपमा पनि मनाउंदै आएको छ ।
