बिहीबार, असोज ७ २०७८ | Thu, September 23, 2021
नेपालको समय: २१:३९ | UK Time: 16:54

अल्डरसटमा आर के एकल सांझ

वीनेपाली
२०७४ पुष ४ गते २२:२९


लन्डन । नेपालका चर्चित लोक गायक रामकुमार (आरके) गुरुङ गत आइतबार अल्डरसटस्थित निरमाया रोधीघरमा झुल्किए एकल सांझ लिएर । तमु प्ये ल्हु संघ यूकेको निम्तोमा बेलायत आएका आरकेले विभिन्न शहरमा आफ्नो कला प्रस्तुत गर्ने क्रममा निरमायामा 
आफ्नो प्रस्तुति दिए । कार्यक्रम क्होला परिवार यूकेले आयोजना गरेको हो ।

उनले एकल सांझमा कयौं ‘भेराइटी’ का गीत गाए । आरकेले गम गुरुङद्वारा निर्मित गुरुङ चलचित्र ‘गोरे बाजे’ को नयां गीत, पूर्व प्रधानाध्यापक एकेन्द्र गुरुङ र फोटोपत्रकार मिलन तमुद्वारा रचित विभिन्न गीत, कौडा, सालैजो र लाइभ दोहोरी समेत प्रस्तुत गरे । उनलाई गायिका ममता गुरुङ र रुपा घर्तीमगरले साथ दिएका थिए ।

तमु प्ये ल्हु संघ यूकेका अध्यक्ष मेजर खुशीमान गुरुङ, तमुधिं यूके अध्यक्ष ज्ञाम गुरुङ, तमु समाज बेलायतका अध्यक्ष अर्जुन गुरुङ र तमु समाज बेलायत आमा समूहकी अध्यक्ष माया गुरुङले संयुक्त रुपमा दीप प्रज्वलन गरी सो एकल सांझको शुरुवात गरिएको थियो । सो अवसरमा क्होला परिवार यूकेका हुम गुरुङले स्वागत मन्तब्य दिएका थिए । गायक आरकेले कार्यक्रम आयोजना गरिदिने क्होला परिवारलाई हृदयदेखिनै धन्यवाद 
दिंदै सहभागी सबैप्रति आभार व्यक्त गरे ।

एकल सांझमा अधिकांश आफ्नै शब्द र संगीतका गुरुङ भाषाका चर्चित गीतहरु गाएर भरपुर मनोरञ्जन दिलाएका गायक आरकेलाई उपस्थित संगीतप्रेमीहरुले खादा लगाई बधाई दिएका थिए । सांझ ७ बजेबाट शुरु भएको उक्त कार्यक्रममा संगीत पारखीहरु अन्त्यसम्म झुमिरहे ।

हाल सुलिकोट गाउंपालिका अर्थात गोरखा सौरपानी ५ बान्चोकगाउंमा वि.स. २०४१ सालमा जन्मिएका रामकुमार (आरके) गुरुङ झन्डै डेढ दशकदेखि कला क्षेत्रमा निरन्तर सक्रिय छन् । उनको पहिलो कोसेली ङै नासा (मेरो गाउं) चलचित्रको ‘माइली रोधी घरमा संगै नाचौंन’ बोलको कौडा गीत हिट भएपछि गुरुङ यस क्षेत्रमा झन् प्रोत्साहित भए ।

त्यसपछि आरकेले ङै जिन्दगी (मेरो जिन्दगी), ङै क्यां (मेरो बाटो), आश्यो (मावली), म्होरा (सपना), भेडी गोठालो, कुटुम्बेरी साइनो, खै ओ म्ही थेवा (ठूलो मान्छे), तीन्हांगा (आजभोलि), ङोलो ङोल्स्यो (सोल्टी-सेल्टिनी) सहित प्रदर्शनका क्रममा रहेको ‘गोरे बाजे’ नामक गुरुङ चलचित्र र ‘कर्मरेखा’ नेपाली भाषाको चलचित्रको गीत लेखन, गायन र संगीत गरेका छन् । उनले कयौं नेपाली मौलिक गीतहरु सालैजो, कौडा र झ्याउरेमा स्वर, संगीत दिएका छन् भने कतिपयमा शब्द रचना आफैंले गरेका छन् ।

बेलायत बसाइ एकदम रमाइलो भइरहेको आरके बताउंछन् । आफन्त भेटघाट, घुमघाम र विभिन्न संघसंस्थाको सम्मानले यस क्षेत्रमा थप प्रोत्साहन मिलेको उनले सुनाए । जनवरी अन्तिमसम्म बेलायत बस्ने योजना बनाएका उनले बेलायतको फार्नबोरो, ननिटन, अल्डरसट र वेल्समा 
’परफर्म’ गरिसकेका छन् भने फेल्थाम, लन्डन हयारो, बेजिङस्टोक, अल्डरसट लगायत शहरमा शो हुंदैछ ।

तस्विर- मिलन तमु

प्रतिक्रिया

सम्बन्धित सामाग्री

फेसबुक