राष्ट्रपतिद्वारा फाल्गुनन्दको शालिक अनावरण

चुलाचुली, इलाम, १० मंसिर – राष्ट्रपति विद्यादेवी भण्डारीले राष्ट्रिय विभूति फाल्गुनन्दको नवनिर्मित शालिक अनावरण गर्नुभएको छ ।

फाल्गुनन्द नोमाङ्गेना सेवा संघद्वारा आयोजित फाल्गुनन्द लाफयङ बहुभाषिक पाठशालाको दोस्रो वाषिकोत्सव समारोहका अवसरमा इलामको चुलाचुली गाउँपालिका वडा नं १ कमलमा महागुरुको उक्त शालिक निर्माण गरिएको हो ।

सबै भाषा, धर्म र संस्कृतिको संरक्षण र संवद्र्धनमा राष्ट्रपतिको जोड

राष्ट्रपति विद्यादेवी भण्डारीले बहुभाषिक, बहुधार्मिक, बहुजातीय मुलुक नेपालका सबै भाषा, धर्म र संस्कृतिको संरक्षण र संवद्र्धन हुनुपर्ने बताउनुभएको छ ।

स्थानीय चुलाचुली गाउँपालिका–१ कमलमा रहेको महागुरू फाल्गुनन्द बहुभाषिक पाठशालाको दोस्रो वार्षिक उत्सवको उद्घाटनका अवसरमा नुमाङ्गेना सेवा संघको आयोजनामा भएको कार्यक्रममा राष्ट्रपति भण्डारीले सबै भाषा, धर्म र संस्कृतिको जगेर्ना गर्नु हामी सबैको कर्तव्य भएकामा जोड दिनुभयो ।

बहुभाषिक पाठशालाको भौतिक पूर्वाधार र शालिक निर्माणमा स्थानीयवासीले गरेको योगदानको उहाँले प्रशंसा गर्नुभयो ।

सोही अवसरमा राष्ट्रपति भण्डारीले राष्ट्रिय विभूति फाल्गुनन्दको शालिकसमेत अनावरण गर्दै समाजमा शान्ति, एकता र धार्मिक सहिष्णुता कायम राख्न तथा भाषा र लिपिको संरक्षणमा ठूलो योगदान पुरयाउनुभएका महागुरुका असल विचार र भावना लिएर अघि बढ्न सबैमा आग्रह गर्नुभयो ।

नुमाङ्गेना सेवा संघका अध्यक्ष डम्बर तुम्बापोको अध्यक्षतामा भएको कार्यक्रममा नेकपा(एमाले)का नेता सुवास नेम्वाङ, नेपाली काँग्रेसका नेता केशव थापालगायतले महागुरू फाल्गुनन्दले समाज सुधारका लागि पुरयाउनुभएको योगदानको चर्चा गर्नुभयो ।

सोह्रौँ राष्ट्रिय विभूति फाल्गुन्दको स्मृतिमा चुलाचुलीमा बहुभाषिक पाठशाला स्थापना गरिएको छ । विसं २०७२ देखि शुरू गरिएको पाठशालामा अहिले ८० बालबालिका अध्ययनरत छन् । किरात लिपिमा पढाइ हुने पाठशालामा स्थानीयवासी सबै जातजातिका बालबालिका निःशुल्क अध्ययनरत रहेको अध्यक्ष तुम्बापोले बताउनुभयो ।

संघले स्थापना गरेर सञ्चालन गर्दै आएको पाठशालामा अबदेखि संस्कृतसहित अन्य भाषाको पनि पढाइ सञ्चालन गरिने लक्ष्य रहेको पाठशालाले जनाएको छ । पाठशालामा किरात लिपि, नेपाली र अंग्रेजीका तीन शिक्षक छन् ।