आइतबार, कार्तिक ९ २०७७ | Sun, October 25, 2020
नेपालको समय: २२:०३ | UK Time: 16:18

नेपाली प्रतिभा प्रतिष्ठान, बेलायतद्वारा सम्मान तथा पुरस्कार घोषणा

वीनेपाली
२०७४ कार्तिक २० गते १२:०१

नयाँ कार्यसमिति

लन्डन । नेपाली प्रतिभा प्रतिष्ठान, बेलायतले यस वर्षको सम्मान तथा पुरस्कार घोषणा गरेको छ । शनिबार बेलायतको हाइवेकममा प्रतिष्ठानकी नवनिर्वाचित अध्यक्ष दीपा लिम्बू राईको अध्यक्षतामा बसेको प्रतिष्ठानको बैठकले वरिष्ठ स्रष्टा वेणु आचार्यलाई ‘प्रतिभा सम्मान’ र युवा स्रष्टा फूलमान वललाई ‘प्रतिभा पुरस्कार’ प्रदान गर्ने निर्णय गरेको हो । सम्मानमा बीस हजार नगद, ताम्रपत्र र दोसल्ला छ भने पुरस्कारमा एक लाख नगद राशि र ताम्रपत्र रहेको प्रतिष्ठानले जनाएको छ ।

वि.सं. १९९८ साल मंसीर १९ गते भोटेछाप, तेह्रथुममा जन्मिनुभएका आचार्यले २०१८ तिरबाट कविता लेख्न थाल्नुभएको थियो । उहाँका ‘असमान यी धर्तीका तस्बिरहरू’ र ‘एक चोक्टा इतिहास’ गरी दुई कविता र एक मुक्तक सङ्ग्रह प्रकाशित छन् । उहाँले ‘छायाँ’, ‘प्रेरणा’, ‘जनजागृति’, ‘कोसीका कोसेली’ जस्ता साहित्यिक संकलन एवं पत्रिकाको सम्पादनसमेत गर्नुभएको छ । उहाँ धरानका वम देवान, कृष्ण पाख्रिनहरुसंग समाज परिवर्तनका लागि साहित्यिक अभियान सन्चालन गर्ने पुराना स्रष्टा हुनुहुन्छ । उहांलाई नेपाली कविताका क्षेत्रमा विशिष्ट योगदान पुरयाएवापत ‘प्रतिभा सम्मान’ प्रदान गरिने भएको हो ।

यसै गरी वि.सं. २०३६ साल असोज १२ गते तिमालको काभ्रेमा जन्मिनुभएका वलका ‘काजोल खातुन’ कथासंग्रह, ‘महाभारतकी मैच्याङ’ कवितासंग्रह र ‘म्हेन्दोमाया’ नाटक प्रकाशित छन् भने उहांले दुई बृत्तचित्रका अतिरिक्त ‘नीरफूल’ नामक चलचित्रको लेखन तथा निर्देशन गर्नुभएको छ । कविता, कथा, नाटक तथा चलचित्र आदिका माध्यमबाट नेपाली समाजको रुपान्तरणमा उल्लेखनीय योगदान पुरयाएवापत स्रष्टा वललाई ‘प्रतिभा पुरस्कार’ प्रदान गरिने भएको हो ।

सन् २००८ मा बेलायतमा स्थापित यस संस्थाबाट हालसम्म स्व. इश्वर मानन्धर, स्व. अम्बर गुरुङ, जीवी लुगुन, भक्तराज आचार्य, प्रा.डा. गोविन्दराज भट्टराई, बुंद राना, टेकवीर मुखिया, प्रद्युम्न श्रेष्ठ सिक्किम र भागीरथी श्रेष्ठ सम्मानित भइसक्नुभएको छ । यसै गरी ‘प्रतिभा पुरस्कार’बाट यसअघि नवीन विभास, कुवेर राई, उपेन्द्र सुब्बा, श्रवण मुकारुङ, मोमिला जोशी, राजकुमार दिक्पाल, भूपाल राई, बीबी अनुरागी र टीका चाम्लिङ पुरस्कृत भइसक्नुभएको छ ।

बैठकले संस्था स्थापनाको एक दशक पुगेको विशेष अवसरमा भाषा, साहित्य तथा सांगीतिक क्षेत्रमा विशिष्ट योगदान पुरयाएवापत संगीत साधना प्रतिष्ठान, नेपाल (इटहरी, सुनसरी), सुदूर पश्चिमान्चल साहित्य समाज (धनगढी, कैलाली), र स्व. पारसमणि प्रधान शालिक संरक्षण समिति (सिलगुढी, पश्चिम बंगाल, भारत) लाई विशेष सम्मान गर्ने निर्णय गरेको महासचिव मिजास तेम्बेले बताएका छन् ।

यसैबीच शनिबारै सम्पन्न प्रतिष्ठानको तेस्रो सम्मेलनले दीपा लिम्बू राईको अध्यक्षतामा गणेश राई र टंक वनेम उपाध्यक्ष, मिजास तेम्बे महासचिव, नरेश नाति सचिव, अन्जु अन्जली सहसचिव, देवेन्द्र खेरेस कोषाध्यक्ष र चोक गुरुङ सहकोषाध्यक्ष रहेको नयाँ कार्यसमिति चयन गरेको छ ।

सम्मान तथा पुरस्कार जनवरी अन्तिम साता राजधानीमा एक समारोह गरी प्रदान गरिने प्रतिष्ठानका कोषाध्यक्ष देवेन्द्र खेरेसले जानकारी दिए ।

प्रतिक्रिया

सम्बन्धित सामाग्री

फेसबुक