एनआरएनएन पोर्तुगलमा बिग्रह, निवर्तमान कार्यसमितिलाई २४ घन्टे अल्टिमेटम

लिस्बोन । एनआरएनएन पोर्तुगलको निर्वाचन सम्पन्न भएको एक महिना पनि नपुग्दै हिसाब किताब बुझबुझारथ कान्डले बिग्रह उत्पन्न भएको छ । अक्टोबर २ तारिख बेलुका ७ः ०० बजे नयाँ कार्यसमितिका केही पदाधिकारीद्वारा रिन्जेन ट्राभल मार्तिम मुनिज लिस्बोनमा आयोजना गर्ने भनिएको पत्रकार सम्मेलन स्थगित गरि निवर्तमान कार्यसमितिलाई हिसाब किताब बुझाउन अक्टोबर ४ तारिख दिउँसो १२ः ०० सम्मको समयसीमा (अल्टिमेटम) दिइएको एक वक्तब्य प्रकाशित गरि जनाइएको छ । तर कार्यसमितिको आधिकारिक धारणा के हो भन्ने बारेमा भने स्पष्ट हुन सकेको छैन् ।

बक्तब्यमा उपाध्यक्षहरु कमल गुरुङ, नारायणकाजी मगर, इश्वर रिजाल, कोषाध्यक्ष कुमार तामाङ, सचिब एगेन्द्र गुरुङ, युवा संयोजक रबिन अधिकारी लगायतले हस्ताक्षर गरेका छन् ।

विवादको चुरो

नयां कार्यसमितिको केहि दिन अगाडि मात्रै बसेको बैठकबाट धेरै गोप्य कुरा पर्दाफास भयो जसमा लेखा एक महत्वपूर्ण पाटो थियो । संघको आर्थिक पाटो के छ, कस्तो छ, हरेक साधारण सदस्यले थाहा पाउनुपर्छ र संघले पनि समय समयमा संस्थाको आर्थिक हिसाब पारदर्शिता तरिकाले प्रस्तुत गर्न सक्नुपर्छ भन्ने आवाज कार्यसमिति भित्रै उठ्यो ।

संघको अघिल्लो कार्यकाल बिबादमा मुछिनुको एक पाटो आर्थिक अपारदर्शिता पनि थियो । अघिल्लो समितिले नयाँ कार्यसमितिलाई २५,९८२. ९६ यूरोको बैंक मौज्दात भएको हिसाब बुझाएको छ भने बांकी रहेको १०, ५०७. ६६ युरो निवर्तमान अध्यक्ष भिम केसी सोमबारसम्म बुझाउने भनी जमानी बसेका थिए । त्यही जमानी पुरा नहुंदा केही नवनिर्वाचित केही पदाधिकारीहरुले अल्टिमेटम सहितको बक्तब्य निकालेका हुन् ।

सबैभन्दा महत्वपूर्ण प्रश्न के छ भने माओबादी केन्द्र निकट जनप्रगतिशील मञ्चले बुझाएका २२८ सदस्यता फारम वापतको २,२८० यूरो रकम अहिलेसम्म पनि संघको कार्यालयमा दाखिला गरिएको छैन् । सदस्यता फाराम संख्यालाई संघमा आफ्नो पद र पदसंख्या मोलमोलाई गर्ने आधार बनाउने संगठनहरु र तिनका अभियन्ताहरुको यो दोहोरो र नांगो चरित्र उदांगो भएको छ ।

किन पुरानो कार्यसमितिले निश्चित म्यादभित्रमा सदस्यता फारमसंगै दस्तुर रकम बुझेनन् ? यो कसको कमजोरी हो ? यसो गर्नुको पछाडिको रहस्य के ? किन नयाँ कार्यसमितिले माओबादी केन्द्र निकट मनोनित उपाध्यक्ष ईश्वर रिजाललाई जमानी राख्दै २२८ सदस्यता फारम वाफतको २२८० युरो सोमबारसम्म बुझाउने म्याद राख्यो? अहिले पोर्तुगलको नेपाली समुदायमा तातो बहसको विषय बनेको छ ।