पाकिस्तानी पूर्व प्रधानमन्त्री शरिफ भ्रष्टाचार हेर्ने अदालतसामु उपस्थित

 

इस्लामावाद, १६ असोज (रासस-एएफपी) – पाकिस्तानी पूर्व प्रधानमन्त्री नवाज शरिफ पाकिस्तानको भ्रष्टाचार हेर्ने एक अदालत सामु उपस्थित हुनुभएको समाचार छ ।

भ्रष्टाचारको आरोपमा दुई महिनाअघि पदबाट पर्खास्त गरिनुभएका पूर्व प्रधानमन्त्री शरिफ सोमबार दोस्रो पटक सो अदालतसामु उपस्थित हुनुभएको पाकिस्तानको राजधानी इस्लामावादबाट विभिन्न अन्तर्राष्ट्रिय सञ्चारमाध्यमहरुले जानकारी दिएका छन् ।

उहाँ सोमबार बिहान सो अदालतमा उपस्थित हुदा अदालत वरिपरिको सुरक्षा व्यवस्था निकै कडा पारिएको समाचारमा उल्लेख गरिएको छ ।

अदालत परिसरलाई प्रहरीले पूरै घेरा हालेको थियो । सो सुरक्षा घेराबाहिर उपस्थित उहाँका समर्थकहरुले शरिफको पक्षामा नाराबाजी लगाएका थिए ।

उनीहरुले पूर्व प्रधानमन्त्री शरिफ दोषी रहेको, उहाँले भ्रष्टाचार नगरेको तर राजनीतिक प्रतिशोधका आधारमा उहाँलाई दोषी बनाइएको भन्दै नाराबाजी गरिरहेका थिए ।

उहाँ अदालत परिसरमा उपस्थित हुदा पाकिस्तानका ठूलो सङ्ख्याका पत्रकार उपस्थित थिए । उहाँलाई टेलिभिजनका फोटो पत्रकारहरुले निकै परसम्म पछ्याएका थिए ।

उहाँमाथि भ्रष्टाचारको आरोपमा छानबीन सुरु भएपछि लामो समयपछि सर्वाेच्च अदालतले गत जुलाई महिनामा उहाँलाई पदमा बसिरहन नैतिकताको आधारमा नमिल्ने भन्दै बर्खास्त गरेको थियो ।

त्यसयता पनि उहाँमाथि अदालतको अनुसन्धान जारी नै छ । उहाँ दोस्रो पटक सोमबार सो अदालतमा उपस्थित हुनुभएको छ र सम्भवत उहाँमाथि जेल सजाय हुनसक्ने अनुमानका समाचारहरु आउन थालेका छन् ।

सोमबारका पाकिस्तानी सञ्चारमाध्यमहरुले पाकिस्तानी पूर्व प्रधानमन्त्री शरिफलाई जेल सजाय हुनसक्ने भनी समाचार सम्प्रेषण गरिरहेका छन् । तर यो समाचारको कानुनी वा अदालती रुपमा पुष्टी भने हुन सकिरहेको छैन ।