बिहीबार, असोज ८ २०७७ | Thu, September 24, 2020
नेपालको समय: ०४:२१ | UK Time: 23:36

बेलायतमा दशैं, दूतावासमा भने तोडियो परम्परा

वीनेपाली
२०७४ असोज १५ गते ११:४५

लन्डन । हिन्दूहरुको महान सांस्कृतिक पर्व दशैं बेलायतका नेपालीले पनि हर्षोल्लासका साथ मनाएका छन् । आश्विन शुक्ल दशमीका दिन शनिबार यहांका नेपालीले मान्यजनबाट दुर्गा भवानीको प्रसादस्वरुप टीका, जमरा थापेर आर्शिवाद लिए । नेपाली उल्लेख्य बसोवास गर्ने बेलायतका केही शहरस्थित नेपाली मन्दिरमा श्रद्धालुहरु टिका जमरा ग्रहण गर्न व्यस्त देखिन्थे । आफ्ना मान्यजन नहुने नेपालीले मन्दिरमा गएर पण्डितहरुबाट टिका जमरा एवं प्रसाद ग्रहण गरे ।

लन्डन प्लमस्टिडको पशुपतिनाथ मन्दिरमा बिहानै देखि सर्वसाधारण टिका जमरा थाप्न उत्साहित देखिन्थे । मन्दिरमा बिहान ९.२५ को शुभ साइतमा टिका लगाउन शुरु गरिएको थियो ।

विश्व हिन्दू मन्दिर साउथहलमा पनि धुमधामसंग दशमी मनाइयो । त्यहां विश्व हिन्दू महासंघ यूकेका अध्यक्ष चिरन्जिवी ढकालले टिका प्रसाद सहित जमरा प्रदान गरे । पण्डित ढकालले करिब एकसय जना भक्तजनलाई टिका जमरा प्रदान गरिएको जनाए । करिब ३० नेपाली परिवारले मन्दिरमा जमरा राख्न दिएका थिए ।

पश्चिम लन्डनका ६ जना नेपाली पण्डितहरुको संयुक्त प्रयासमा यसपटक घटस्थापनाका दिन सामूहिक जमरा, नवरात्रीसम्म पूजा, भजन कीर्तन, कालरात्री पूजा, वाटफोर्ड कृष्ण मन्दिरबाट फूलपाती भित्रयाउने कार्य, नवमीका दिन ९ वर्ष मुनीका ९ जना कन्याको पूजा एवं अन्तिम दिन घट्स्थापना बिर्सजन तथा टिका कार्यक्रम गरिएको थियो । उक्त कार्यक्रमको संयोजक चिरन्जिवी ढकाल थिए ।

अल्डरसटको शिव कल्चरल एण्ड कम्युनिटी सेन्टरले पनि टिका कार्यक्रम गरेको थियो ।

उता, हाल बेलायत भ्रमणमा रहेका सम्माननीय प्रधानन्यायधिश गोपाल पराजुलीले पनि लन्डन हन्स्लोमा राजदूत डा. दुर्गाबहादुर सुवेदीसहित सर्वसाधारणलाई टिका तथा जमरा प्रदान गरे ।

दूतावासमा देखिएन दशैं चहलपहल

लन्डनस्थित नेपाली दूतावासमा भने यसपटक दशैं चहलपहल भएन । बेलायतका नेपालीहरुको आस्थाको केन्द्र र अभिभावक ठानिने दूतावासमा विगत वर्षहरुमा दशैंका बेला सर्वसाधारणलाई भोज अथवा टिका वितरण कार्यक्रम हुन्थ्यो । राजदूत डा. दुर्गाबहादुर सुवेदीले कार्यभार सम्हालेको वर्ष दिन पुगिरहंदा उनले लन्डनमा त्यो परम्परा तोडेका हुन् । लन्डनको कार्यक्रम दशैं तिहारबीचमा स्कटल्याण्डमा गर्ने तयारी गरेको बताइएको छ ।

कतिपय अग्रजहरुले वर्षौंदेखि चलिआएको परम्परा यसपटक दूतावासमा नदेख्दा खिन्न महशुस गरेका छन् । शुक्रबारमात्र 
दूतावासमा प्रधानन्यायधिश पराजुलीको सम्मानमा विशेष रात्रीभोज गरिएकाले कतिपयले त्यसैलाई ‘दशैं रिप्लेसमेन्ट’ पनि ठानेका छन् ।

प्रतिक्रिया

सम्बन्धित सामाग्री

फेसबुक