स्यान्डहस्ट नेपाली समाजको दसैं भेला

लन्डन । परदेशी जीवनको व्यस्त समयको चटारोलाई पन्छाउँदै फेरि वर्ष दिनपछि आएको विसं २०७४ सालको दशैंको अवसरमा स्यान्डहस्ट नेपलिज कम्युनिटीको दशैं पार्टी शनिवार सम्पन्न भएको छ ।

स्यान्डहस्ट मेमोरियल पार्कस्थित सामुदायिक भवनमा अपरान्ह ४ बजे देखि कार्यक्रम शुरु भएको थियो । समाजका अध्यक्ष रामकुमार लिम्बु र प्रमुख अतिथि मेजर रिटायर्ड टिकेन्द्र दल देवानबाट दीप प्रज्वलन गरिएपछि समाजका महासचिव तारा वनेम एवं सहसचिव समशेर वनेमले औपचारिक कार्यक्रम शुभारम्भ गरेका थिए ।

नेपाल र बेलायतको राष्ट्रिय गीत बजेपछि समाजका सदस्य मुकेश राईले उपस्थित सम्पूर्णलाई स्वागत गरेका थिए । त्यसपछि शुरु भएको मनोरञ्जनात्मक कार्यक्रम संस्थाका सदस्य एवं समितिका मनोरन्जन को-अर्डिनेटर रामकृष्ण जिमीले सञ्चालन गरेका थिए । जसमा स्यान्डहस्टकै नानीहरुले अत्यन्तै मनोरन्जनात्मक नेपाली संस्कृति झल्किने नृत्य र गीतहरु प्रस्तुत गरे । कार्यक्रममा सुश्री हेन्जेला लिम्बुले मीठो स्वरमा अंग्रेजी गीत प्रस्तुत गरी सबैलाई चकित तुल्याइन् ।

कार्यक्रममा विभिन्न प्रकारका पेय पदार्थ बलराम गुरुङ र मीना गुरुङले ब्यवस्थापन गरेका थिए भने दसैं विशेष परिकार थाली, थाली रेस्टुरेन्टका सूर्य गुरुङले ब्यवस्थापन गरेका थिए ।

बेलायतको आवासीय अधिकार (पिआर) पाएपछि बेलायतको विभिन्न स्थानमा जस्तै स्यान्डहस्टमा पनि ब्रिटिश गोर्खामा कार्यरत सिपाही र परिवारहरुको घना आवादी छ । उक्त क्षेत्रमा विशेष गरि जिइनर्जी नामक कम्पनीले अत्यावश्यक ग्यास र इलेक्ट्रिक सुविधा आपूर्ति गर्दै आएको छ ।

स्यान्डहस्टवासी झन्डै २८ घरले जिइनर्जीबाट सेवा लिएवापत ५६० पाउन्ड यसै कार्यक्रमको अवसरमा प्रमुख अतिथिले समाजका अध्यक्ष लिम्बुलाई हस्तान्तरण गरे । यस विषयमा समाजका सदस्य हिरण्य राईले जानकारी दिएका थिए ।

प्रमुख अतिथी मेजर रिटायर्ड टिकेन्द्र दल देवानले कार्यक्रममा उपस्थित भएर दसैंको शुभकामना आदान प्रदान गर्न पाउंदा ज्यादै हर्ष लागेको बताउंदै सम्पूर्ण स्यान्डहस्टवासीप्रति धन्यवाद व्यक्त गरे ।

स्यान्डहस्ट नेप्लिज समाजका अध्यक्ष राम कुमार लिम्बुले उपस्थित सम्पूर्ण महानुभावहरुमा दसैंको शुभकामना ब्यक्त गर्दै कार्यक्रम सफल पार्न सघाउने सबैप्रति धन्यवाद ब्यक्त गरेका थिए ।

उक्त कार्यक्रमका निम्ति नेत्र थापा (स्यान्डहस्ट समाजका उपाध्यक्ष), मिन राई, जुरेन्द्र राई, हिराधन राई, भालुमान वानेम, दुर्गा रामजाली र सूर्य गुरुङ (थाली थाली रेस्टुरेन्ट) लगायतले प्रायोजन गरेका थिए ।