पहिलो नेपाल आइडल बुद्ध लामा बेलायत आउने

लन्डन । कतारमा शुक्रबार राती सम्पन्न ग्राण्ड फिनालेमा पहिलो ‘नेपाल आइडल’ घोषित बुद्ध लामा बेलायत आउने भएका छन् ।
मनकामना रेमिटका निर्देशक राजाराम गिरी र पोखरा ट्राभलका निर्देशक ज्ञाम गुरुङको निमन्त्रणामा आउन लागेका लामाको बेलायतमा ६ शहरमा शो हुने भएको हो ।

नेपाल आइडल फस्ट रेड कार्पेट शो आगामी २७ अक्टोबर शुक्रबार एसियन कम्युनिटी हल प्लमस्टिडमा गर्ने तय भएको छ । त्यसैगरि २८ अक्टोबरमा रेडिङ, २९ स्वीन्डन, ३ नोभेम्बर एम्पायर हल अल्डरसट, ४ नोभेम्बरमा हकिन्ज कम्युनिटी हल फोकस्टन र अन्तिम नोभेम्बर ५ आइतबार लन्डन हयारोमा शो हुने भएको छ । शोबाट बचेको पैसा आयोजकले बाढी पीडितलाई दिने बताएका छन् ।

कतारको दोहास्थित ग्राण्ड मलमा भएको फाइनल प्रतिस्पर्धामा दर्शकको भोटिङ आधारमा लामा नेपाल आइडल घोषित भएका थिए । प्रतियोगितामा इटहरीका निशान भट्टराई फस्ट रनरअप र काठमाडौंका प्रताप दास सेकेण्ड रनरअप घोषित भए ।

प्रतिस्पर्धीले पाएको कुल ९ करोड ३१ लख ३ हजार ३ सय ३५ भोटमध्ये लामाले ४ करोड ४८ लाख ४५ हजार २ सय ६३ भोट पाएको आयोजकले जनाएको छ । लामालाई महजोडीले पुरस्कार हस्तान्तरण गरेका थिए ।

नेपाल आइडल घोषित लामाले २० लाख रुपैयां र महिन्द्रा केयूभी १०० कार पाएका छन् । साथै, उनले १५ लाख बराबरको एल्बम सम्झौता पनि पाउनेछन् ।

फस्ट रनरअप भट्टराई र सेकेन्ड रनरअप दासले क्रमशः १५ लाख रुपैयां र १० लाख रुपैयां पुरस्कार पाएका छन् । भट्टराईले ३ करोड ५० लाख ८६ हजार २ सय २३ मत र दासले १ करोड ३२ लाख ५१ हजार ८ सय ४९ भोट पाएका थिए ।

एपीवान टेलिभिजनले ‘प्रतिष्ठाको पहिलो आवाज’ खोज्ने कार्यक्रम गरेको हो । अन्तिम नतिजा घोषणा हुने बेला एपीवान टेलिभिजनले लाइभ प्रसारण गर्ने भनेर देश विदेशका लाखौं दर्शकलाई घण्टौं कुराएर झुक्याएपछि टिभीप्रति सामाजिक सञ्जालभर आक्रोश व्यक्त भएका छन् । टेलिभिजनले प्राविधिक कारणवस प्रत्यक्ष प्रसारण गर्न नसकिएको भन्दै क्षमा मागेको छ ।

फिनालेको भिडियो यहां छः

https://www.youtube.com/watch?v=qq44tK00JU0&feature=share