लिस्बोन, १९ सेप्टेम्बर । युरोपमा नेपालीले नेपालीको हत्या गरेको सायद पहिलो घट्ना होला । घट्नाले युरोप स्तव्ध भइरहेका बेला हत्यारा पक्राउ परेका छन् । कामको सिलसिलामा सामान्य विवादमा गत सेप्टेम्बर १२ तारिख छुरा प्रहार गरि पोर्तुगलको राजधानी लिस्बोनमा हत्या गरिएका हरिबहादुर जिसीका हत्यारा अर्जुन सापकोटा आज मृतकको दाहसंस्कार गर्दा गर्दै पक्राउ परेका हुन् ।
संयोग नै मान्नु पर्छ, जुनबेला मृतक लास जलिरहेको थियो त्यही बेला लिस्बोनको रोमामा नेपालीद्वारा सञ्चालित पोखरा रेस्टुरेन्टबाट एनआरएनए पोर्तुगलका उपाध्यक्ष कमल गुरुङको अगुवाइमा हत्यारा पक्राउ परे । हत्यारा त्यहाँ आएको कुरा रेस्टुरेन्टका सञ्चालकले नै जानकारी गराएका थिए । पक्राउ पछि उनलाई पुलिसमा बुझाइएको थियो ।
‘हत्यारा पक्राउको सहयोगका लागि हाम्रो पुरै टोली खटिएको थियो, आज सफलता मिल्यो’, एनआरएनए पोर्तुगलका अध्यक्ष कुबेर कार्कीले भने । पीडित परिवारका बालबच्चालाई सहयोग पुरयाउन एनआरएनए पोर्तुगलले अभियान नै चलाएको र यसमा खुलेरै सहयोग प्राप्त भएको अध्यक्ष कार्कीले जानकारी गराए । सहयोगीहरुको सबै नाम अभियान समाप्त भएपछि घोषणा गरिने उनले बताए । नव निर्वाचित अध्यक्ष कार्कीले समाजको समस्या समाधानका लागि राम्रो सुरुवात गरेको भनि पोर्तुगलमा चर्चा भएको छ ।
