सलमान खानको शोमा ओइरिए नेपाली

लन्डन । बलिउड सुपरस्टार सलमान खानसहितका भारतीय कलाकारहरुको शोले बेलायतवासी नेपालीलाई पनि आकर्षित गरयो । गत १७ सेप्टेम्बर ‘ओटु एरिना’ मा आयोजित ‘दबंग द टुर’ मा नेपालीको उल्लेख्य सहभागिता रहयो । उक्त शोमा मार्केट डाइरेक्ट लिमिटेडका प्रवन्ध निर्देशक एवं सफल युवा व्यवसायी विकास नेपालले प्रायोजन गरेकाले पनि नेपाली सहभागिता उल्लेख्य भएको हो । ओटुमा शो हेर्न २० हजार टिकट पहिल्यै ‘सोल्ड आउट’ भएको थियो ।

मार्केट डाइरेक्टले बेलायती बजारमा प्रिमियम क्वालिटी भएको नेपाली खाद्य उत्पादनहरु विक्री वितरण गर्दै आएको छ । उक्त कम्पनीले हालैमात्र यूके बजारमा वाइवाइ चाउचाउ आयात गर्न चौधरी ग्रुप युरोपसंग सम्झौता गरिसकेको छ ।

उक्त शोमा सलमान खानबाहेक सोनाक्षी सिन्हा, ज्याकलिन फर्नान्डेज, डेजी शाह, बादशाह, प्रभु देवा, मनिष पल, सुरज पन्चोली, सोहेल खान, कमाल खान लगायतको समूहले भरपुर मनोरन्जन दिएको थियो ।

खानलाई ग्लोवल डाइभर्सिटी अवार्ड

यसैबीच, बलिउड सुपरस्टार सलमान खानले बेलायतको संसद ‘हाउस अफ कमन्स’ मा ‘ग्लोवल डाइभर्सिटी अवार्ड’ प्राप्त गरेका छन् । ब्रिटेनको संसदमा सबैभन्दा लामो समय सांसद रहेका किथ भाजले खानलाई उक्त अवार्ड प्रदान गरेका थिए । खानले विश्वभर विविधता पस्कन योगदान गरेवापत उक्त अवार्ड दिइएको सांसद भाजले जानकारी दिएका छन् । भाजले खान फिल्म अभिनय गर्ने सफल कलाकारमात्र नभएर मानवीय सहायता गर्ने व्यक्ति समेत भएको भन्दै प्रशंसा गरेका थिए ।

खानको विश्वका विभिन्न ठाउंमा ‘बिइंग हयुमन’ नामक एनजिओ समेत सञ्चालित छ ।