आइतबार, असोज ४ २०७७ | Sun, September 20, 2020
नेपालको समय: ०१:१० | UK Time: 20:25

नेपाल इन्जिनियर्स एसोसिएसनको पाँचाैँ विदेश शाखा युकेमा

वीनेपाली
२०७४ असोज २ गते ११:११

photo by Mana Sunuwar

लण्डन । नेपाल इन्जिनियर्स एसाेसिएसनको विदेशस्थित पाँचाैँ शाखाका रुपमा युके सेन्टरको समुद्घाटन गरिएको छ ।

आइतबार अल्पर्टनमा आयोजित एक समारोहबीच बेलायतका लागि नेपाली राजदूत डा दुर्गाबहादुर सुवेदीले सो सेन्टर समुद्घाटन गरे भने नेपालबाट आएका एसोसिएसनका केन्द्रीय अध्यक्ष इन्जिनियर हरेराम श्रेष्ठ र महासचिव उमेशप्रसाद थानीले ब्यानर उद्घाटन गरे ।

युके सेन्टरका अध्यक्ष इन्जिनियर तेजेन्द्र रोकामगरको अध्यक्षतामा भएको सो समारोहमा बाेल्दै राजदूत सुवेदीले एसोसिएसनको सकारात्मक र रचनात्मक कार्यमा दुताबासको सधैँ सहयाेग र सहकार्य रहने बताए । एनअारएनए युकेका अध्यक्ष योगकुमार फगामीले इन्जिनियरहरुलाई शुभकामना दिँदै एसोसिएसनसित सहकार्य गर्न एनअारएन इच्छुक रहेकाे बताए ।

नेपालबाट आएका एसोसिएसनका अध्यक्ष श्रेष्ठले बेलायतका नेपाली इन्जिनियरहरुलाई आइपर्ने समस्यामा सहयोग गर्न एसोसिएसन तयार रहेको बताए । उनले युके प्रविधिको विकास र प्रयोगमा सन्सारकै अग्रणी रहेकाे उल्लेख गर्दै त्यस्ता प्रविधिको प्रयोग गरेर मानव जातिलाई नै जीवनयापन सजिलो बनाउन इन्जिनियरहरुलाई अाग्रह गरे । त्यस्तै महासचिव थानीले युके सेन्टरलाई सबै नेपाली इन्जिनियरको प्रतिनिधि सङ्स्थाका रुपमा अघि बढ्न र भविष्यमा अझै धेरै इन्जिनियरलाई समेट्न सुझाव दिए ।

कार्यक्रममा नेपाल पत्रकार महासंघ युके शाखाका अध्यक्ष नरेश खपाङ्गीमगरले नेपालबाट भर्खर आएका इन्जिनियरहरुलाई काम खाेज्न सघाउन र युकेमै दीक्षित नयाँ इन्जिनियरहरुलाई नेपालसित जोड्न सेन्टरलाई अनुराेध गरे ।

कार्यक्रममा महासचिव इन्जिनियर लाेकराज सिंहले स्वागत तथा सल्लाहकार इन्जिनियर केदार पन्तले इन्जिनियर्स एसोसिएसन स्थापना गर्नुको उद्देश्यबारे चर्चा गरेका थिए । कार्यक्रममा अध्यक्ष श्रेष्ठले युके सेन्टरका पदाधिकारी तथा सदस्यहरुलाई एसोसिएसनको पिन र महासचिव थानीले खादा लगाइदिएका थिए । यसैगरी केन्द्रीय अध्यक्ष श्रेष्ठले नेपाली दूताबास, एनअारएनए युके र नेपाल पत्रकार महासंघलाई मायाको चिनाे प्रदान गरेका थिए ।

कार्यक्रमको अन्त्यमा इन्जिनियरहरु, उनीहरुका परिवारका सदस्य तथा कोसेली कल्चर ग्रुपबाट साँस्कृतिक कार्यक्रम पनि देखाइएकाे थियाे। कार्यक्रम रमेश सराङकोटीले चलाएका थिए । कार्यक्रममा युकेस्थित विभिन्न सङ्घ संस्थाका प्रतिनिधिहरु, युवा इन्जिनियरहरु र उनका परिवारजनकाे उपस्थिति थियाे ।

प्रतिक्रिया

सम्बन्धित सामाग्री

फेसबुक