बाढीमा घरपरिवार गुमाएका टेकबहादुर दर्नाल /तस्वीर इकान्तिपुर
लन्डन । बेलायतको उत्तरी भाग क्याट्रिकमा बसोबास गर्ने नेपालीहरुको समाज ब्रिटिश गोरखा नेपलिज कम्युनिटी क्याट्रिकले नेपालमा केही महिनाअघि गएको बाढीपहिरोमा परेका दुई परिवारलाई आर्थिक सहयोग गरेको छ ।
समाजका अनुसार झापा सिमलबारी ३ का टेकबहादुर दर्नाललाई २ लाख १२ हजार र चितवनस्थित राप्ति नगरपालिका १३ की ६० वर्षीय मैया माया चेपाङलाई २ लाख ५० हजार रुपियाँ घर बनाउनका लागि सहयोग गरिएको हो । दर्नालले बाढीमा श्रीमती छोरी र घर गुमाएका छन् । यसैगरी चेपाङले श्रीमान गुमाएकी छिन् । उनी आफैँलाई पहिरोले थिचेको थियो ।
नेपाली भाषा संस्कृतिको जगेर्ना र आपसी सद्भाव कायम गर्ने उद्देश्य राखेर स्थापित कम्युनिटीले बाढी पीडिलाई सहयोग संकलनका लागि ज्ञानेन्द्र आलेको संयोजकत्वमा एक समिति गठन गरेको थियो । सो समितिले ३ हजार ३४९ पाउन्ड ३२ पेन्स सहयोग संकलन गरेको थियो ।
समाजले यसअघि महाभूकम्प पीडितका लागि करिब ३० लाख नेपाली रुपियाँ बराबरको सहयोग हस्तान्तरण गरेको थियो ।
समाजका अध्यक्ष रामबहादुर मल्ल र संयोजक आलेले सहयोग संकलनमा सहयोग गर्ने सबैमा धन्यवाद दिएका छन् ।
