बेलायत आतंकवादी आक्रमणको ‘उच्च जोखिम’ तहमा

लन्डन । लन्डनमा शुक्रबार बिहान भूमिगत रेल 
(अण्डरग्राउण्ड ट्रेन) मा विष्फोट गराउन संलग्न रहेको आशंकामा केन्ट प्रहरीले शनिबार एक युवालाई पक्राउ गरेको छ । शुक्रबार रातभरको खोजीपछि प्रहरी संदिग्ध आक्रमणकारीलाई गिरफ्तार गर्न सफल भएको हो । १८ वर्षीय ति युवालाई ‘टेरोरिजम एक्टको सेक्सन ४१’ अन्तर्गत बेलायतको डोभर पोर्टबाट पक्राउ गरिएको छ । उनलाई साउथ लन्डन पुलिस स्टेशन ल्याइने प्रहरीले जनाएको छ । तर, ति युवाबारे प्रहरीले विस्तृत बताएको छैन् ।

प्रति आतंकवादका वरिष्ठ राष्ट्रिय संयोजक डेपुटी असिस्टेन्ट कमिश्नर निल बासुले युवा पक्राउसंगै अनुसन्धानमा थप सफलता मिलेको बताएका छन् ।

शुक्रबार व्यस्त कार्यालय समय बिहान ८.२० मा साउथ वेष्ट लन्डनको पार्सन्स् ग्रीन स्टेसनमा विष्फोट भएको थियो । टाइमरबाट गराइएको उक्त विष्फोटका कारण २९ जना घाइते भएका छन् । घाइते धेरैको अनुहार जलेको छ । तर, आतंककारीको योजना अनुरुप उक्त विस्फोट नभएपछि सयौं यात्रुको ज्यान जोगिएको छ । रेलमा कम्तीमा ८ सय यात्रु रहेको अनुमान छ । उक्त आक्रमणको आइसीलले जिम्मेवारी लिएको छ ।

बेलायत आतंकवादी आक्रमणको उच्च जोखिममा

बेलायत अन्तर्राष्ट्रिय आतंकवादी आक्रमणको उच्च जोखिममा रहेको निष्कर्षसहित सुरक्षा व्यवस्था कडा बनाइएको छ । प्रधानमन्त्री टेरेजा मे र प्रति आतंकवादका वरिष्ठ राष्ट्रिय संयोजक डेपुटी असिस्टेन्ट कमिश्नर निल बासुले बेलायतमा आतंकवादी हमलाको उच्च खतरा 
(क्रिटिकल लेभल) रहेको बताउंदै सावधानी अपनाउन अपिल गरेका छन् । ‘क्रिटिकल लेभल’ भन्नाले कुनै पनि बेला अर्को आक्रमण हुन सक्छ । जोइन्ट टेरोरिजम एनलाइसिस सेन्टरले आतंकवादी आक्रमणको उच्च खतरा रहेको निष्कर्ष निकालेको हो ।

अहिले बेलायतको राजधानी लन्डनका मुख्य ठाउंहरुमा सेना परिचालन गरिएको छ ।

आतंकवादी आक्रमणको खतरालाई पांच तहमा वर्गीकरण गरिएको छ । ‘क्रिटिकल लेभल’ पुगेपछि ५ हजारसम्म सशस्त्र सेनालाई शहरका 
विभिन्न प्रमुख स्थान, बजार, यातायात क्षेत्र र भीडभाडमा परिचालन 
गरिन्छ ।

सन् २००६, १ अगष्टमा आधिकारिक रुपमा जोखिमको तह वर्गीकरण गरिएपछि क्रिटिकल लेभलसम्म पुगेको यसपटक चौंथो हो ।

सन् २०१७ मा मात्र बेलायतको संसद भवन नजिक वेष्ट मिनिष्टर, फिन्सबरी पार्क, म्यानचेस्टर र लन्डनब्रीज गरि चार प्रमुख आतंकवादी आक्रमण भए ।

म्यानचेस्टरमा गत मे २२ मा आयोजित अमेरिकी गायिका एरियाना ग्रान्डेको एउटा कन्सर्टमा गरिएको आत्मघाती विस्फोटमा २२ जना मारिएका थिए भने ५९ जना घाइते भएका थिए ।

गत जुन ३ मा लन्डनब्रीजमा आतंककारीले भ्यान कुंदाइ लगत्तै छुरा हानेर ८ सर्वसाधारणको हत्या गरेको थियो । घट्नामा तीन आतंककारी पनि मारिएका थिए ।

त्यसैगरि गत मार्च २२ मा वेष्ट मिनिस्टर ब्रीजमा एकजना 
आतंककारीले अन्धाधुन्ध कार कुदाउंदा प्रहरीसहित ५ जनाको ज्यान गएको थियो । पछि प्रहरीले उक्त आतंककारीलाई गोली हानी मारिदिएको थियो । इकान्तिपुर