पूर्वगोर्खा सैनिक बुढामगरद्वारा विश्वका छैटौं अग्ला शिखरको सफल आरोहण

लन्डन । नेपाली कीर्तिमानी आरोही तथा पूर्वगोर्खा सैनिक हरि बुढामगरले कृत्रिम खुट्टाको सहायताले विश्वका छैटौं शिखर कार्स्टेन्स पिरामिड (पुन्काक जया)को सफल आरोहण गर्नुभएको छ ।

अक्टोबर १८ तारिख बिहान ७ बजे ओसिनियाको सबैभन्दा अग्लो यो शिखरमा पुगेर उहाँले कृत्रिम खुट्टाको सहायताले यो हिमाल चढ्ने पहिलो व्यक्तिको कीर्तिमान बनाउनुभएको हो । सेभेन समिट अभियानअन्तर्गत विश्वका सातै महाद्वीपका अग्ला शिखर चढ्ने उहाँको यात्रामा यो छैटौं सफलता मिलेको हो । उहाँले कार्स्टेन्स पिरामिड सात शिखरमध्ये सबैभन्दा प्राविधिक रूपमा चुनौतीपूर्ण रहेको बताउनुभएको छ ।

उहाँको यो सफल आरोहणमा नेपालका मिङ्मा फोर्त्से, अविरललगायत स्थानीय गाइडहरूले सहयोग गरेका थिए। सेभेन समिट ट्रेक्स, फोर्टीन् पिक्स एक्स्पिडिशन र ट्रपिक एडभेन्चर पपुआ जस्ता संस्थाहरूले लजिस्टिक सहयोग पुर्‍याएका थिए।

बुढामगरले हालसम्म मोन्ट ब्लांक (४,८१० मि.), माउन्ट किलिमन्जारो (५,८९५ मि.), माउन्ट एभरेस्ट (८,८४९ मि.), डेनाली (६,१९० मि.), एकोनकागुवा (६,९६१ मि.) र कार्स्टेन्स पिरामिड (४,८८४ मि.) को आरोहण गरिसक्नुभएको छ ।

अब उहाँ आफ्नो अन्तिम लक्ष्य अण्टार्कटिकाको माउन्ट भिन्सन (४,८९२ मि.) आरोहणका लागि आगामी डिसेम्बरमा प्रस्थान गर्दै हुनुहुन्छ ।

सन् २०१० मा अफगानिस्तान युद्धमा दुवै खुट्टा गुमाएका बुढामगरले कृत्रिम खुट्टाको सहायताले आफ्नो साहसिक यात्रालाई निरन्तरता दिँदै आउनुभएको छ ।