उत्तर कोरियाको आणविक परीक्षण करिब ५० किलोटन

सोल, १९ भदौ । उत्तर कोरियाले आइतबार गरेको आणविक परीक्षण करिब ५० किलोटनको रहेको दक्षिण कोरियाको रक्षा मन्त्रालयले सोमबार संसदमा जानकारी दिएको छ ।

उत्तर कोरियाले गत बर्षको सेप्टेम्बरमा गरेको आणविक परीक्षणको तुलनामा यो तीन गुणा ठूलो भएको जानकारी पनि सो अवसरमा दिइएको थियो ।

उक्त आणविक तत्व अमेरिकाले सन् १९४५ मा हिरोसीमा ध्वस्त गर्न बनाएको बम भन्दा पनि तीन गुणा ठूलो भएको बताइएको छ ।

उत्तर कोरियाले आइतबार हाइड्रोजन बम मिश्रित शक्तिशाली आणविक परीक्षण गरेको थियो । यस हाइड्रोजन बम सफल परीक्षण गरेको समाचार समितिमार्फत उत्तर कोरियाले सम्प्रेषण गरेको थियो ।

ब्रिक्स नेताद्वारा कडा निन्दा

सिआमेन (चीन), १९ भदौ । उत्तर कोरियाले गरेको पछिल्लो आणविक परीक्षणको ब्रिक्स समूहका पाँच राष्ट्रले कडा शब्दमा निन्दा गरेको छ । प्योङ्गयाङको अन्तर्राष्ट्रिय जगतमा नै निन्दा भएको ब्रिक्स राष्ट्रहरुले जानकारी दिएका छन् ।

‘उत्तर कोरियाले गरेको आणविक परीक्षणको हामी कडा शब्दमा निन्दा गर्छौ’ चीनको सिआमेनमा सुरु भएको बार्षिक सम्मेलनमा ब्रिक्स राष्ट्रका नेताहरुले संयुक्त रुपमा प्रेस विज्ञप्ति प्रकाशित गरेका छन् ।

ब्रिक्समा ब्राजिल, रसिया, भारत दक्षिण अफ्रिका र चीन रहेका छन् । यसपटक यस सम्मेलनको आतिथ्य चीनले गरेको छ । चीन लामो समयदेखि उत्तर कोरियाको नजिकको देशका रुपमा रहेको बताइन्छ ।

‘कोरियाली प्रायद्वीपमा लामो समययता आणविक परीक्षणका कारण उत्पन्न परिस्थितिप्रति हामी गहिरो चिन्ता व्यक्त गर्र्दछौ’ चीनको दक्षिणी सहर सिआमेनमा सुरु भएको यस समम्मेलनका क्रममा जारी घोषणपत्रमा ब्रिक्स सदस्य राष्ट्रहरुले भनेका छन् ।

ब्रिक्स राष्ट्रहरुले उत्तर कोरियाले जारी राखेको यस आणविक परीक्षणबाट उत्पन्न समस्या समाधानका लागि प्रत्यक्ष वार्ता आवश्यक रहेको विश्वास गरिएको बताएका छन् ।

उत्तर कोरियाले आइतबार हाइड्रोजन बम मिश्रित शक्तिशाली आणविक परीक्षण सफलतापूर्वक गरेको दाबी गरेको छ ।