कृषि तथा खाद्य सुरक्षाविज्ञ घले अमेरिकामा सम्मानित

न्यूयोर्क । कृषि तथा खाद्य सुरक्षाविज्ञ यमुना घले अमेरिकामा सम्मानित भएकी छिन् । घलेले नेपालको कृषि र खाद्य सुरक्षाको क्षेत्रमा पुरयाएको योगदानको कदर गर्दै तमु परिवार न्यूयोर्कले सम्मान गरेको हो । नेपालका लागि स्वीस राजदूतावासमा वरिष्ठ कार्यक्रम अधिकृतको रुपमा कार्यरत घले विगत २५ वर्षदेखि कृषि तथा खाद्य सुरक्षाको क्षेत्रमा नेपालमा कार्यरत छन् ।

घलेले नेपालको कृषि क्षेत्रलाई आर्थिक उन्नति र आर्थिक उपाजर्नसंग जोड्नु पर्ने भन्दै त्यसतर्फ तमु समुदाय सचेत हुनुपर्ने बताइन् ।

यसैबीच, कृषि तथा खाद्य सुरक्षाविद घलेले जनजाति कहां छन् भन्ने सन्दर्भ कोट्याउंदै राज्य संरचनामा आफूहरुको उपस्थितिका लागि भावी सन्तततिलाई त्यस्तै खालको वातावरण बनाउंदै लैजानुपर्नेमा जोड दिइन् । उनले विदेशमा रहेका दाजुभाइ तथा दिदी बहिनीहरुले देशको आर्थिकवृद्धिमा रेमिट्यान्समार्फत योगदान पुरयाएको भन्दै यस्ता रेमिट्यान्सलाई आर्थिक उपार्जन हुने खालका उद्यमशील क्षेत्रमा लगानी गर्न आग्रह गरिन् ।

तमु परिवार न्यूयोर्कका अध्यक्ष डम्मर जंग गुरुङले चेली भएर देशको विकास क्षेत्रमा पुरयाएको योगदानको चर्चा गर्दै घलेको काम र योगदानको प्रशंसा गरे । उनले गुरुङ समुदायका लागि घलेको ज्ञान, अनुभव र शिक्षालाई अनुसरण गरेर नयां पुस्तालाई अघि बढ्न सुझाव दिए । तमु परिवारका सचिव जेनी गुरुङले सञ्चालन गरेको सम्मान तथा अन्तरक्रियामा उपाध्यक्ष मनिता गुरुङले स्वागत मन्तव्य राखेकी थिइन् ।

वगेनिंगन युनिभर्सिटी नेदरल्याण्डसबाट कृषिमा मास्टर डिग्री गरेकी घलेले अहिले खाद्य सुरक्षा विषयमा विद्यावारिधि गरिरहेकी छन् ।