एनआरएन इटालीको चुनाव नजिकिँदै

इटाली । एनआरएनए इटालीको चुनाव नजिकिंदै गर्दा उम्मेदवारहरुले आफ्ना प्रतिवद्धता सार्वजनिक गर्न थालेका छन् । सामाजिक सन्जाल र पत्रकार सम्मेलनमार्फत आफ्नो 
उम्मेदवारीको औचित्य पुष्टि गर्ने प्रयास उनीहरुको छ ।

आइसीसी सदस्य उमेदवार क्षेत्रकुमार श्रेष्ठले लाप्राक वस्ती निर्माणस्थलमा आफू पुगेको र त्यहांको भौगोलिक अवस्थासंग चिरपरिचित भएकाले आफूले आइसीसी सदस्यको उम्मेदवार बन्नुपरेको उल्लेख गरेका छन् । भूकम्प पीडितहरुको राहतका लागि इटालीबाट संकलित दुई लाख ५४ हजार यूरो एनआरएनएको भूकम्प पीडित राहत तथा पुनर्निर्माण कोषमा जम्मा गरिएको उनले बताए । उनले उक्त रकम लाप्राक वस्ती निर्माणमा प्रयोग गरिएकाले उक्त परियोजनाको अन्त्यसम्म आफ्नो भूमिका रहनुपर्ने दाबी गरे ।

वर्तमान कार्यसमितिको अध्यक्ष रहेका श्रेष्ठ आफूले घोषणा गरेको आपतकालिन राहतकोष वृद्धि गर्दै लैजानुका साथै इटाली र नेपालमा रहेका नेपालीहरुलाई आवश्यक पर्दा प्रयोग गरिनुपर्ने उल्लेख गरेका छन् । पांच हजार यूरो आपतकालिन राहतकोषका लागि बनाएपछि पहिलोपटक नेपालका बाढी पीडितका लागि एक हजार यूरो सहयोग घोषणा गरिएको श्रेष्ठले बताए ।

प्रवासका जन्मिएका सन्ततिहरुलाई नेपाली संस्कृति र भाषाको कक्षा सञ्चालन गर्ने उद्देश्यले एक शहर एक नेपाली भाषा कक्षाको नारा अगाडि सारिएको छ । त्यसै अन्तर्गत इटालीको मिलान शहरमा मितेरी मन्च मिलानोको सहकार्यमा नेपाली भाषा कक्षा सञ्चालन गर्न लागिएको र निकट भविष्यमा अन्य शहरहरुमा पनि विस्तार गरिने बताइएको छ ।

अध्यक्ष र महासचिवका आफ्नै प्रतिवद्धता
आगामी कार्यकालका लागि अध्यक्षका उमेदवार राजन चापागाईंले आफूले यसअघिको कार्यसमितिमा महासचिव पदमा रही जिम्मेवारी वहन गरिसकेकाले आफैं उपयुक्त उमेदवार रहेको उल्लेख गरेका छन् । एक विज्ञप्ति प्रकाशित गर्दै चापागाईंले स्थानीय संघसंस्थाहरुसंग सुमधुर सम्वन्ध बनाउंदै एनसीसीलाई थप सक्रिय राख्न आफ्नो विवेक प्रयोग गर्ने उल्लेख गरे ।

महासचिवका उमेदवार आइ पी सुवेदीले आफूलाई योग्य उमेदवारको रुपमा प्रस्तुत गर्दै सद्भाव र सहकार्य गर्दै अगाडि बढ्ने प्रतिवद्धता व्यक्त गरेका छन् ।

आइसीसी सदस्यका उम्मेदवार क्षेत्रकुमार श्रेष्ठले जारी गरेको विज्ञप्तिः

आदरणीय इटालीवासी सम्पूर्ण नेपाली दाजुभाइ तथा दिदीबहिनीहरु

गैर आवासीय नेपाली संघ इटालीको तर्फवाट आगामी २०१७-२०१९ का लागि आइसीसी सदस्यको रुपमा उमेदवार बनेको छु । संघको स्थापनकाल देखि नै सक्रिय रुपले आफ्नो विवेक र क्षमताले भ्याएसम्म इमान्दरपूर्वक आफूलाई समर्पित गरेको सबैलाई पुनस्मरण गराउन चाहन्छु ।

आगामी कार्यकालका लागि निम्न कारणले आफ्नो उमेदवारी आवश्यक रहेको इटालीवासी दाजुभाइ तथा दिदीवहिनीहरुलाई जानकारी गराउंदछु ।

नेपालमा आएको महाविध्वंशकारी भूकम्प पीडितहरुको राहत तथा पुनस्थापनाका लागि इटालीको तर्फबाट दुई लाख ५४ हजार युरो आर्थिक सहयोग गैर आवासीय नेपाली संघमा जम्मा गरिएको 
सर्वविदितै छ । उक्त रकमबाट लाप्राकमा भूकम्प पीडितहरुको वस्ती निर्माणमा खर्च भइरहेको छ । प्रतिकुल मौसम र भौगोलिक विकटताको वावजुद पनि निर्माणकार्य तदारुकताका साथ अगाडि बढिरहेको छ । लाप्राकवस्ती निर्माणस्थलको यथार्थ आफूले भोगेकोले उक्त परियोजनालाई निष्कर्षमा पुरयाउन र इटालीबाट गरिएको सहयोग लक्षित समूहमा पुरयाउन मेरो उमेदवारी आवश्यक छ।

इटालीमा हुर्कंदै गरेका नेपाली वालवालिकाहरुलाई नेपाली भाषा कला संस्कृतिको संरक्षण र सवर्धन गराउनका लागि नेपाली भाषा कक्षालाई एक शहर एक नेपाली भाषा कक्षा अभियान सञ्चालन गरिनेछ। त्यसै योजना अनुसार गैर आवासीय नेपाली संघ इटाली र मितेरी मन्च मिलानोको संयुक्त रुपले कार्यक्रम सन्चानल हुंदैछ। यसलाई विस्तार गर्ने मेरो जिम्मेवारी हुनेछ ।

अनायाश नै आइपर्ने दैवी प्रकोप तथा अन्य आपतकालिन उद्दार र 
राहत कार्यका लागि गैर आवासीय नेपाली संघ इटाली राहत कोष स्थापना गरी ५००० युरो समेत उपलव्ध गराइसकेको अवस्थामा उक्त रकमलाई वृद्धि गर्दै सशक्त राहतकोषको रुपमा विकसित गर्ने मेरो लक्ष्य छ ।

आइसीसी सदस्यको हैसियतले बिगतमा झैं एनआरएनले आयोजना गर्ने कुनै पनि सम्मेलनमा इटालीको प्रतिनिधित्व गर्दै पुग्नेछु ।

क्षेत्र कुमार श्रेष्ठ
अध्यक्ष
तथा
आइसीसी सदस्य उमेदवार