न्यूयोर्क (अमेरिका) । नेपालका आदिवासी जनजातिको भाषा, कला, संस्कृति, परम्परा र भेषभूषालाई अन्तर्राष्ट्रियकरण गर्ने उद्देश्यसहित पहिलो पटक अमेरिकामा आदिवासी चलचित्र महोत्सव २०१७ आयोजना गरिने भएको छ ।
२३ औं विश्व आदिवासी दिवसको अवसरमा न्यूयोर्कमा पहिलो पटक नेपाल आदिवासी चलचित्र महोत्सव गर्न लागिएको महोत्सवकी सञ्चार संयोजक मच्छे गुरुङले बताएकी छिन् ।
महोत्सवले आदिवासी जनजातिको परम्परागत शैलीमा बनाइएका चलचित्रहरुलाई प्रोत्साहन गर्नुका साथै उनीहरुको परम्परा, भाषा, कला, संस्कृतिलाई अन्तर्राष्ट्रियस्तरमा प्रवर्धन गर्न महोत्सव आयोजना गर्न लागिएको गुरुङले जानकारी दिइन् ।
नेपाल आदिवासी जनजाति महासंघ फिप्ना अमेरिकाको आयोजनामा हुने महोत्सवले आदिवासी जनजातिको हक, अधिकार सुनिश्चित गराउन र पहिचानको मुद्दालाई स्थापित गराउन सहयोग पुग्ने फिप्नाका अध्यक्ष लुइसाङ वाइवाले बताएका छन् । मूलधारको चलचित्रबाट ओझेलमा परेका आदिवासी जनजातिका कथावस्तुमा आधारित चलचित्रहरुको प्रवर्धन गर्ने उद्देश्यले महोत्सव आयोजना गरिएको अध्यक्ष वाइवाको भनाइ छ ।
चलचित्र महोत्सव अगष्ट २५ देखि २७ तारिखसम्म तीन दिन ढाका क्लबमा हुनेछ । तीन दिने महोत्सवमा चलचित्र र लघु चलचित्र गरि एघार चलचित्र प्रर्दशन गरिनेछ । गुरुङ भाषाको मैंरिमो, तामाङ भाषी चलचित्र सेम ताबा म्ही, लिम्बु भाषाको हेलुक्वा, मगर भाषाको लोम्बा, नेवारी चलचित्र कृषा गौतमीसहित अन्य चलचित्र प्रदर्शन गरिने तय भएको छ ।
त्यसैगरी, राई भाषाको सुम्निमा र मुस्ताङी चलचित्र ‘शेरढाक’ लाई महोत्सवमा स्थान दिइएको छ । त्यसैगरी, लघु चलचित्रहरुमा नेवारको ‘कल्ली’, थारुको ‘लाज’ माझीको ‘बन्ठी’, र मुगालको ‘फेके’, प्रदर्शन गरिने मिडिया संयोजक गुरुङले बताइन् । महोत्सवमा सन् २०१७ मा आयोजित आदिवासी जनजाति चलचित्र महोत्सवमा पब्लिक च्वाइस अवार्ड जितेको गुरुङ भाषाको ‘कर्म क्या’ र सन् २०१५ मा उत्कृष्ट आदिवासी राष्ट्रिय पुरस्कार जितेको राई भाषाको ‘मतान’ को विशेष प्रदर्शन गरिने महोत्सवका संयोजक मणि वाङदेलले जानकारी दिए ।
महोत्सवमा विभिन्न ११ विद्यामा उत्कृष्ट हुनेलाई ट्रफी, पुरस्कार र सम्मान स्वरुप प्रमाणपत्र प्रदान गरिनेछ । उत्कृष्ट चलचित्रलाई एक लाख नगद, ट्रफी सहित प्रमाणपत्र दिइने छ । कार्यक्रम भव्य र सभ्य रुपमा सफल बनाउन फिप्नाका अध्यक्ष लुइसाङ वाइवाले सबै जातिय सदस्य संस्थाहरु लगायतलाई सहयोगका लागि अनुरोध गरेका छन् ।
चलचित्र महासंघ फिन्फी र इन्डिजिनियस फिल्मस् अर्काइभ आइफा सह आयोजक रहेको उक्त महोत्सवमा नेपाली महावाणिज्य दूतावास न्यूयोर्क र नेपाल चलचित्र विकास बोर्ड विशेष सहयोगी संस्था रहने फिप्नाले जनाएको छ ।
