भारतको ७० औँ स्वतन्त्रता दिवस मनाइयो

नयाँ दिल्ली (भारत), ३१ साउन । भारतको ७० औँ स्वतन्त्रता दिवसको अवसरमा नयाँ दिल्लीको लाल किल्लामा बोल्दै भारतीय प्रधानमन्त्री नरेन्द्र मोदीले ‘गोली र गाली’ बाट कश्मीरको समस्या समाधान नहुने बताउनु भएको छ ।

उहाँले पृथकतावादीहरुले काश्मीरमा ‘षड्यन्त्र रचिरहेको’ बताउनुभयो । प्रधानमन्त्रीले धर्मका नाममा हिंसा गराउने कतिपय समुदायलाई सम्बोधनमा कटाक्ष गर्नुभयो । उहाँले जातिवाद र साम्प्रदायिक हिंसा मच्चाइंदा राष्ट्रको उत्थानमा समस्या हुने बताउनुभयो ।

उहाँले मिलेर कश्मीरमा देखिएका समस्याको समाधान गर्नुपर्ने पनि बताउनुभयो । तर आरोप वा हतियारको भरमा समस्या समाधान नहुने बताउदै कश्मीरको समस्याको पहिचान गर्न सम्बद्ध सवैको इमान्दार प्रयास चाहिने उहाँको भनाई थियो । कश्मीरीहरुसँग मिलेर उक्त स्थानलाई ‘पुनः स्वर्ग जस्तै बनाउनुपर्ने’ मा प्रधानमन्त्रीले जोड दिनुभयो ।

सलमान समुदायको बसोबास रहेको काश्मीरमा भारत र पाकिस्तानबीच दशकौंदेखि कायम सीमा विवादको केन्द्रमा रहँदै आएको छ ।

पाकिस्तानले आफ्नो ७० औँ स्वतन्त्रता दिवस १४ अगस्तमा मनाउने गर्छ । पाकिस्तानले स्वतन्त्रता दिवस मनाएको भोलिपल्ट भारतले भव्य कार्यक्रमसहित आफ्नो स्वतन्त्रता दिवस मनाएको हो ।

मोदीले उत्तरी भारतमा अक्सिजनको अभावमा ज्यान गुमाएका ६० बालबालिकाको मृत्युको विषयमा बोल्दै देशलाई उनीहरुका परिवारको पीडामा एकताबद्ध हुन पनि अपील गर्नुभयो । उहाँको सम्बोधनलाई भारतीय सञ्चारमाध्यमले प्रत्यक्ष प्रशारण गरेका थिए । सम्बोधनस्थलमा पनि ठूलो भीड स्वतन्त्रता दिवस मनाउन सहभागी बनेको थियो ।