लन्डन । एनआरएनए यूकेका सचिव कृष्ण तिवारीले आसन्न निर्वाचनमा उपमहासचिव पदमा उम्मेदवारी दिने भएका छन् । सोमबार सञ्चारकर्मीमाझ तिवारीले उपमहासचिव र पत्रकार एवं कवि नारायण गाउंलेले सचिवमा उम्मेदवारी दिने घोषणा गरेका हुन् । उनीहरुसंगै चार्टर्ड अकाउन्टेन्ट महेश गिरीले सह कोषाध्यक्ष एवं सन्जय पन्त र सुरेश परियारले सदस्यमा उम्मेदवारी दिने घोषणा गरे ।
एनआरएनए यूकेको ९ सेप्टेम्बरमा हुने अधिवेशनका लागि यतिखेर उम्मेदवारी घोषणा गर्ने लहरबीच वाटफोर्ड क्षेत्रबाट सामूहिक उम्मेदवारी घोषणा भएको हो ।
तिवारीले आफूहरुका बेग्लै एजेन्डा भन्दा पनि अध्यक्षलाई सहयोग र अभिप्रेरित गर्ने योजनासहित उम्मेदवारी दिने निष्कर्षमा पुगेको बताए । एनआरएनए यूकेका सचिवका रुपमा हरेक गतिविधिमा आफ्नो शतप्रतिशत सहभागिता रहेको बताउंदै तिवारीले नेपाल हाउस प्रोजेक्टमा समेत आफ्नो क्रियाशिलता सुनाए ।
नेतृत्वमा आए यूकेबाट विशेषगरि इन्जिनियरहरुको सीप नेपाल लैजान, स्वास्थ्य तथा शिक्षा क्षेत्रमा सहयोग गर्न र बेलायतका नेपालीको हित तथा कल्याणकारी काम गर्न आफू सक्रिय हुने प्रतिवद्धता तिवारीले व्यक्त गरे ।
सचिवको उम्मेदवारी दिन लागेका साहित्यकार एवं पत्रकार गाउंलेले बेलायतका नेपालीलाई मातृभूमिसंग जोड्न भाषा र साहित्य प्रमुख हुने भएकाले यसतर्फ कटिवद्ध हुने बताए । उनले आफूहरुको मुख्य प्राथमिकता संघको साख सुधार्ने रहेको समेत बताए ।
सहकोषाध्यक्षका आकांक्षी महेश गिरीले आफ्नो व्यवसायिक दक्षता संघमा प्रयोग गर्दै आर्थिक पारदर्शीतामा जोड दिने बताए ।
तस्विरः शिव भण्डारी
