सिड्नी, १५ साउन । अष्ट्रेलियाको राजधानी सिड्नीमा एक विमानलाई उडिसकेपछि खसाल्नेगरी बनाइएको भनिएको आतङ्कवादी योजनालाई निस्तेज पारिदिएको जनाइएको छ ।
अष्ट्रेलियाका प्रधानमन्त्री म्याल्कोम टर्नबुलले आइतबार सो जानकारी गराउनुभएको छ । उहाँले प्रतिआतङ्कवाद प्रहरीले सो योजना अगावै त्यसबारेमा पत्ता लगाएको र विमान खसाल्ने एउटा योजनालाई विफल बनाइदिएको बताउनुभएको हो ।
गएराति उनीहरुले यस्तो योजना बनाएर त्यसमा संलग्नहरुको खोजी गरेका थिए । प्रहरीले त्यसमा संलगन भएको आशङ्कामा सिड्नी क्षेत्रमा चारवटा घरमा छापा मारेर केहीलाई पक्राउ पनि गरेको छ । आइतबार बिहान प्रहरीले चार जनालाई गिरफ्तार गरेको जनाएको छ ।
यस विषयमा अनुुसन्धान सुरु गरिएको छ । अनुसन्धानकर्ताहरुले उक्त हमलाको तयारीमा विस्फोटक सामग्रीको प्रयोग गर्ने योजना बनाइएको थाहा भएको बताएका छन ।
उक्त आतङ्कवादी हमला सार्वजनिक भएपछि अष्ट्रेलियाका सबै विमानस्थलहरुमा सुरक्षा व्यवस्था थप कडा बनाइएको छ । अष्ट्रेलियाको प्रहरीले विस्फोटक सामाग्रीको प्रयोग गरी विमानलाई विस्फोटन गराउन लागिएको सूचनाका आधारमा गरिएको खोजीमा उक्त खतरनाक योजनाको पर्दाफास भएको जनाएको छ ।
प्रधानमन्त्री टर्नबुलले आतङ्कवाद विरोधी कारबाही अन्तर्गत सो योजना विफल बनाउन प्रहरी सफल भएको भन्दै अब विमानस्थलमा सुरक्षा व्यवस्था निकै कडा बनाइने जानकारी दिनुभएको छ ।
भारी हातहतियारले सुसज्जित प्रहरी र अष्ट्रेलियाको घरेलु गुप्तचर निकायका सदस्यहरुले सिड्नीका विभिन्न ठाउँमा छापा मारेर कम्तीमा चार जनालाई पक्राउ गरेका छन ।
उक्त सम्भावित आक्रमणको बारेमा भने प्रहरीले केही बताएको छैन । त्यसको जोखिम कत्तिको थियो एवम् खसाल्न खोजिएको भनिएको सो विमान अन्तर्राष्ट्रिय उडनको थियो कि राष्ट्रिय उडान भन्ने बारेमा पनि स्पष्ट नभएको बताइएको छ ।
सिड्नी सहरका साथै विमानस्थलमा पनि थप सुरक्षा सतर्कता कायम गरिएको छ । त्यसैगरी देशका अरु विमानस्थल र भूभागहरुमा पनि थप सुरक्षाकर्मी खटाइएको छ ।
प्रधानमन्त्री टर्नबुलले यात्रुहरुलाई धैर्य धारण गर्न आग्रह गर्नुभएको छ । उहाँले आत्मविश्वासका साथ कामगर्न सबै सुरक्षाकर्मी र काममा जाने सबै नागरिकलाई पनि आग्रह गर्नुभएको बताइएको छ ।
अष्ट्रेलियामा यसअघि पनि आतङ्कवादी हमलाको प्रयास भएको बताइएको थियो । आतङ्कवादको हमलाको जोखिम रहेको भनी यसअघि पनि समाचार आएको बताइएको थियो ।
