लण्डन । तनहुँ समाज युकेको दशौँ वार्षिक भेटघाट सम्पन्न भएको छ ।
समाजका अध्यक्ष लेख गुरुङको अध्यक्षतामा शनिबार अल्डरसटको कन्नड स्कुलमा भएको सो समारोहका प्रमुख अतिथि नेपाली दुताबास लण्डनका तृतीय सचिव भूपेन्द्र घिमिरे रहेका थिए ।
सचिव वेदराज पराजुलीको संचालनमा भएको सो कार्यक्रममा घिमिरेका साथै नेपाल पत्रकार महासंघ युकेका अध्यक्ष नरेश खपाङ्गीमगर, डार्टफोर्ड काउन्सिलका काउन्सिलर डा. बच्चुकैलाश कैनीलगायतले शुभकामना मन्तब्य दिएका थिए ।
सो अवसरमा समाजको दशौँ वार्षिकोत्सवका अवसरमा प्रकाशित मुखपत्र ‘प्रतिविम्व’ को विमोचन गरिएको थियो । सो पत्रिकाका बारेमा सम्पादक रोहित गुरुङले जानकारी दिएका थिए ।
कार्यक्रममा स्नातक उत्तीर्ण गर्ने समाजका सदस्यका छोराछोरीहरु, आजिवन सदस्यहरुलाई सम्मान गरिएको थियो । यस्तै, ब्रिटिश सेनामा पदोन्नति भएका सदस्यहरुलाई पनि अभिनन्दन गरिएको थियो ।
कार्यक्रममा नेपालबाट आएका कलाकार पवन रानामगर, मधुसुधन थापामगर, कल्पना गुरुङ, राजु ढकाललगायतले मनोरञ्जन दिलाएका थिए । यस्तै, तनहुँको स्थानीय स्वाद झल्कने चुट्का पनि प्रस्तुत गरिएको थियो भने सविता रानामगर लगायतको टोलीले नृत्य प्रस्तुत गरेको थियो ।
