लन्डनमा गुरु पूर्णिमा मनाइयो

लन्डन । बेलायतका नेपाली पण्डितहरूको साझा संस्था पशुपति केन्द्र लण्डनद्वारा आयोजित गुरु पूर्णिमा २०१७ गत आइतवार साउथहलस्थित विश्व हिन्दू मन्दिरमा भव्यताका साथ सम्पन्न भएको छ ।

नेपालबाट आउनु भएका देवघाट गलेश्वर पीठाधीश महामण्डलेश्वर अनन्त विभूषित स्वामी आत्मानन्द गिरीको विशेष सम्मान पश्चात् आशीर्वचनबाट कार्यक्रम अगाडि बढेको थियो । स्वामीलाई मन्दिरका पूजारीले तिलक लगाएर स्वागत गरेका थिए भने समाजसेवी महन्त श्रेष्ठले माला लगाएर अभिनन्दन गरे । संस्थाका कार्यवाहक संयोजक पं. गोविन्द नेपालले अभिनन्दन पत्र समर्पण गरेका थिए । मन्दिरका अध्यक्ष सुदर्शन भाटियाले दोसल्ला ओढाएर स्वामीको सम्मान गरे । कार्यक्रम सञ्चालन संस्थाका महासचिव दुर्गाप्रसाद पोख्रेलले गरेका थिए ।
स्वामी आत्मानन्द गिरीले अज्ञानको अन्धकार चिर्न गुरुको महत्वपूर्ण भूमिका हुने जनाउंदै आत्माको अमरत्व आदि विषयमा सारगर्वित प्रवचन दिनुभएको थियो । कार्यक्रममा प्रश्नोत्तर सत्र पनि समावेश गरिएको थियो र बिभिन्न भक्तका धार्मिक आध्यात्मिक जिज्ञासालाई स्वामीले समाधान गर्नु भएको थियो ।

कार्यक्रममा बेलायतका लागि नेपाली राजदूत डा. दुर्गाबहादुर सुवेदी क्षेत्रीले राजदूतावास एवं नेपाल सरकारको तर्फबाट सबैमा गुरु पूर्णिमाको शुभकामना दिए । कार्यक्रममा हालसालै व्रह्मलीन स्वामी १००८ रामानन्द गिरीको स्मृतिमा एक मिनेट शिव पञ्चाक्षरी मन्त्र सामूहिक पाठ गरिएको थियो ।

कार्यक्रममा लण्डनका समाजसेवी, विद्वान्, व्यवसायी गरी विभिन्न स्थानबाट आएका भक्तजनहरूको उल्लेख्य उपस्थिति थियो । दान दातव्यबाट उठेको करिब रू १ लाख पन्ध्र हजार (आठ सय पचास पाउण्ड) रकम गलेश्वर आश्रमका लागि पशुपति केन्द्र लण्डनको तर्फबाट संस्थाका पदाधिकारीहरूले स्वामीलाई प्रदान गरेका छन् । समारोहमा सामूहिक आरती पछि सात्विक प्रीति भोजको व्यवस्था पनि गरिएको थियो ।