बेजिङस्टोकमा पत्रकार खड्काको तनाव व्यवस्थापन सेमिनार

लन्डन । बेजिङस्टोक नेप्लिज कम्युनिटीले गत ७ जुलाई शुक्रबार सांझ तनाव ब्यवस्थापनसम्बन्धि एउटा सेमिनार गरेको छ । सामाजिक महिला अभियन्ता सुधा गुरुङको पहलमा कार्यक्रम भएको हो ।

छात्रवृत्ति लिएर लिड्स विश्वविद्यालयमा अन्तर्राष्ट्रिय मानवअधिकार विषयमा स्नातकोत्तर गर्न आएका कान्तिपुरका पत्रकार एवं मनोविज्ञ घनश्याम खड्काले सेमिनार गराएका हुन् । जीवनमा तनावमुक्त रहि कसरी खुशी रहन सकिन्छ ? भन्नेबारे सेमिनार गरिएको हो । लगभग ९० जना सहभागी उक्त कार्यक्रम सांझ दुई घण्टा चलेको थियो । सेमिनारमा मनोविज्ञ खड्काले तनाव हुनाको कारण र सोबाट मुक्त हुन विविध थेरापी र मेडिटेसन विधिबारे अवगत गराए ।

कम्युनिटीले व्यस्तता बाबजुद समय दिएकामा खड्काप्रति आभार व्यक्त गरेको छ ।

 

कान्तिपुर राष्ट्रिय दैनिकमा कानुन बिट हेर्ने वरिष्ठ सह सम्पादक खड्काको मनोविज्ञान सम्वन्धि उपन्यास ‘निर्वाण’ २०७३ मा मदन पुरस्कार लागि मनोनित भएको थियो । ‘बेस्ट सेलर’ को उपाधि पाएको उनको सो कृति हाल अंग्रेजी भर्सनमा पनि प्रकाशित भइसकेको छ र अमाजोनमा किन्ड्ल भर्सनमा पनि उपलब्ध छ ।

पेशाले व्यवसायिक पत्रकार भए पनि बुद्धिज्मका अनुयायी खड्काको मनोविज्ञानतिर विशेष झुकाव छ । खड्काले नेपालमा पनि कयौं तनाव व्यवस्थापन सेमिनार र ‘काउन्सिलिङ’ गरिसकेका छन् । लिड्स युनिभर्सिटीमा समेत स्वयंसेवी रुपमा सो कार्य गर्दै आएको उनले बताए ।

१४० राष्ट्रका एक हजार ९ सय ५० जना स्कलर्समध्येबाट छानिएर लिड्स विश्वविद्यालय पढ्न आएका खड्का गत ५ जुलाइमा लन्डनको अलेक्जेन्डर हलमा आफूहरुको सम्मान तथा सामूहिक विदाई कार्यक्रममा सहभागी भएका थिए । अन्तर्राष्ट्रिय मानवअधिकार विषयमा स्नातकोत्तर अध्ययन सफलता पूर्वक सम्पन्न गरी केहि महिना पछि खड्का नेपाल फर्कनेछन् ।