फानबोरो । ग्रेटर रसमोर नेपाली कम्युनिटी र स्थानीय रसमोर बरो काउन्सिलको संयुक्त पहलमा नेपाली समुदायका अग्रजहरुलाई हाउजिङ सम्बन्धि अनुशिक्षण तालिम दिइएको छ ।
रसमोर बरो काउन्सिल प्रागंणमा ०६ जुलाई २०१७ मा सम्पन्न हाउजिङ सम्बन्धि तालिममा घरधनी र भाडामा लिनेका हक अधिकार, कर्तब्य साथै सोही विषयको कानुनबारे जानकारी गराइएको थियो ।
उक्त अनुशिक्षणमा काउन्सिलका कम्युनिटी डेभलपमेन्ट मेनेजर लुइस वेभर, रसमोर हाउजिङका हिलारी स्मिथ अनि टिम, शिला लिम्बु, ग्रेटर रसमोर नेपाली कम्युनिटीका तर्फबाट अध्यक्ष ओम थापा, सम्पूर्ण पदाधिकारी र सल्लाहकारहरुले सहयोग गरेका थिए ।
२५ जना नेपाली नेतृत्व वर्गको सहभागिता रहेको उक्त कार्यक्रमको दोश्रो चरणमा ग्रेटर रसमोर नेपाली कम्युनिटीका काउन्सिल संयोजक नेम थापाको पहलमा हयाम्सायर काउण्टी काउन्सिल लोकल फ्री ड्रग्स एण्ड अल्कोहल सर्भिसका माइक न्यूमेन र उनको टिमले ड्रग्स एण्ड अल्कोहल एब्यूज र यसबाट समुदायका बालबालिका, युवा एवं वृद्धवृद्धाहरु समेतमा पर्न जाने नकारात्मक असर तथा निराकरणका उपाय विषयमा तालिम दिइएको थियो । यस विषयमा ग्रेटर रसमोर नेपाली कम्युनिटीसंगको सहकार्यमा निरन्तर तालिम दिइने नेम थापाले बताए ।
गत वर्षदेखि नेपाली समुदायलाई बेलायती संस्कार, रहनसहन, नियम कानुनलगायत जीवन जिउने कला सम्बन्धि जानकारी दिन थालिएको हो । नेपाली र स्थानीय समुदायबीच सकारात्मक र पारस्पारिकता विकास गर्ने उद्देश्यकासाथ हरेक तीन महिनामा कुनै एक विधामा केन्द्रित रही नेपाली नेतृत्व वर्गलाई रसमोर बरो काउन्सिल र ग्रेटर रशमोर नेपाली कम्युनिटीको साझेदारीमा अनुशिक्षण तालिम दिन शुरु गरिएको कम्युनिटीका वरिष्ठ उपाध्यक्ष जीव बेल्बासेले जानकारी दिए ।
