शनिबार, असोज ३ २०७७ | Sat, September 19, 2020
नेपालको समय: ०१:३० | UK Time: 20:45

चुनावी सरगर्मी बढ्यो, ठूला नेता आउने क्रम वृद्धि

वीनेपाली
२०७४ असार ६ गते १२:२३

नेकपा (एमाले)का अध्यक्ष केपी शर्मा ओली मङ्गलबार झापाको दमकस्थित कृष्णमन्दिरमा आयोजित चुनावी सभामा बोल्दै । तस्बिर ः सुमन घिमिरे, उर्लाबारी(मोरङ), रासस

बनियानी (झापा), ६ असार । आसन्न स्थानीय तहको निर्वाचनमा आफ्ना उम्मेदवारलाई जिताउन ठूला दलका नेता झापा आउने क्रम बढेको छ ।

नेपाली काँग्रेस, नेकपा (एमाले), नेकपा (माओवादी केन्द्र) र राप्रपाका ठूला नेता आफ्नो उम्मेदवारका पक्षमा जित दर्ज गराउन जिल्ला आउने क्रम बढेको हो । इलाम, पाँचथर र ताप्लेजुङ जानका लागि हवाइमार्गबाट झापा पहिला आउनुपर्ने भएकाले प्रायः दलका नेताहरु यहाँ आएर एक दुई कार्यक्रममा सहभागी हुने गरेका छन् ।

चुनावी अभियानकै क्रममा केही दिनअघि झापा आउनुभएका काँग्रेस युवा नेता गगनकुमार थापाले काँकरभिट्टा, धुलाबारीलगायत स्थानमा पार्टीले आयोजना गरेको चुनावी सभामा सम्बोधन गर्नुभएको थियो । चुनावी अभियानकै क्रममा उहाँ पूर्वी पहाडी जिल्ला ताप्लेजुङ र पाँचथरमा जानुभएको छ ।

त्यस्तै तीन दिनअघि काँग्रेस नेता डा रामशरण महत काँकरभिट्टा र शनिश्चरेको चुनावी गतिविधिमा सहभागी हुनुभएको थियो । झापा धुलाबारीका काँग्रेस केन्द्रीय सदस्य विश्वप्रकाश शर्मा जिल्ला दौडाहामा व्यस्त हुनुहुन्छ । उहाँ १५ वटै स्थानीय तहको चुनावी प्रचार अभियानमा जुट्नुभएको छ । काँग्रेस झापा सभापति उद्धव थापाले उम्मेदवारको मनोबल बढाउन अन्य शीर्ष नेता जिल्ला आउने बताउनुभयो ।

सोमबार मात्र काँग्रेस केन्द्रीय सदस्य नवीन्द्रराज जोशीले काँग्रेस बिर्तामोडमा कार्यकर्तासँग भेटघाट गर्दै परिणाम आफ्नो पक्षमा पार्न दिलोज्यान दिएर लाग्न निर्देशन दिनुभयो ।

त्यस्तै चुनावी अभियानकै क्रममा एमालेका अध्यक्ष केपी शर्मा ओली चार दिनका लागि सोमबार झापा आउनुभएको छ । गृहनगरमा एमालेको बलियो उपस्थिति बनाउन उहाँ यहाँ आउनुभएको हो । झापा आएलगत्तै उहाँले कनकाई नगरपालिकाको चुनावी सभालाई सम्बोधन र दमकमा अगुवा कार्यकर्तासँग भेटघाट गर्नुभएको थियो ।

आज उहाँले दमकमा आयोजित चुनावी सभालाई सम्बोधन गर्नुभएको छ । बुधबार अर्जुनधारा र मेचीनगर तथा बिहीबार गौरादहको चुनावी सभालाई सम्बोधन गरेर उहाँ काठमाडौँ फर्कने कार्यक्रम रहेको एमाले झापा अध्यक्ष चिन्तन पाठकले जानकारी दिनुभयो ।

त्यस्तै एमाले पोलिटब्युरो सदस्य अग्नि खरेल झापाको १५ वटै स्थानीयका उम्मेदवार सार्वजनिक कार्यक्रममा सहभागी भएर हाल चुनावी अभियानकै क्रममा जिल्लामा रहेका छन् । सांसद जितु गौतम कचनकवल गाउँपालिकामा चुनावी अभियानमा क्रियाशील छन् ।

यता चुनावी अभियानकै सिलसिलामा माओवादी केन्द्रका केन्द्रीय नेता राम कार्की, केन्द्रीय कार्यालय सदस्य वेद गुरुङ, नेता अग्निप्रसाद सापकोटालगायत नेता झापा आउन लागेको पार्टीका जिल्ला संयोजक मणिकुमार साम्पाङले जानकारी दिनुभयो ।

उता राष्ट्रिय प्रजातन्त्र पार्टीका महामन्त्री राजेन्द्र लिङ्देन गृह जिल्लामै व्यस्त हुनुहुन्छ । चुनावी कार्यक्रमका लागि अन्य शीर्ष नेता झापा आउने कार्यक्रम रहेको पार्टीका जिल्ला अध्यक्ष अम्बरबहादुर विष्टले जानकारी दिनुभयो ।

प्रतिक्रिया

सम्बन्धित सामाग्री

फेसबुक