ब्रेक्जिटपछि स्वदेश फर्कंदै जर्मनमुलका बेलायती

बर्लिन (जर्मनी), ३० जेठ । बेलायतले यूरोपियन यूनियनबाट बाहिरिने निर्णय गरेसँगै सन् २०१६ मा जर्मनमुलका बेलायती नागरिकको स्वदेश फर्किने लहर ह्वात्तै बढेको छ ।

जर्मनीको केन्द्रिय तथ्याङ्क कार्यालयले मङ्गलबार दिएको जानकारी अनुसार सन् २०१६ मा बेलायत बसोवास गर्दै आएका नागरिक सन् २०१५ को तुलनामा ३६१ प्रतिशत बढी जर्मनी फिर्ता हुनका लागि आवेदन दिएका छन् ।

सन् २०१५ मा नागरिकताका लागि परेको निवेदनमा ८५६ जनालाई नागरिकता प्रदान गरिएकोमा सन् २०१६ मा अहिलेसम्मकै धेरै दुई हजार ८५६ जनाले जर्मन नागरिकता पाएका हुन् । यो गत बर्षको तुलनामा दुई हजार २०० स्वीकृत आवेदकको सङ्ख्या हो ।

यसलाई बेलायतले इयूबाट बाहिरिने भनी जनमत सङ्ग्रहबाट लिएको निर्णयसँग जोडेर हेरिएको जर्मन विश्लेषकले बताएका छन् ।

तथाकथित ‘हार्ड ब्रेक्जिट’ को प्रसङ्ग वा बेलायतलाई युरोपिएन यूनियन र यसको एकल बजार सम्वन्धि नीतिका कारण कतिपय बेलायती नागरिकताधारी अन्य मुलका व्यवसायीले आफ्नो अधिकार तथा व्यवसायमा समस्या आउन सक्ने देखेपछि जर्मनी वा अन्य यूरोपेली मुलुकमा आउने गरेका उनीहरूको विश्लेषण छ ।

सन् २०१६ मा जम्मा एक लाख १० हजार ४०० जर्मनमुलका तर विश्वका विभिन्न मुलुकमा बसोबास गर्दै आएका आप्रबासीहरूले आफ्नो निबेदन अनुसार जर्मन नागरिकता पाएका कार्यालयले जनाएको छ । यो गत बर्षको तुलनामा २.९ प्रतिशतको बृद्धि हो ।

पछिल्लो समयमा सवैभन्दा बढी १६ हजार २९० जर्मनमुलका टर्कीबासीले जर्मनीमा बसोबासका लागि अनुमति पाएका थिए । यद्यपि यो सङ्ख्या सन् २०१५ को तुलनामा १६.९ प्रतिशत कम हो ।

त्यसैगरी दोस्रो समूहमा पोल्याण्डबाट जर्मनी आउनका लागि निवेदन दिने नागरिक परेका र यो सङ्ख्या छ हजार ६३२ रहेको छ ।

जर्मनी आउन चाहने नागरिकको सरदर उमेर ३३ बर्ष रहेको र उनीहरू सरदर १७ बर्ष भन्दा बढि जर्मनीमा बिताएका पाइएको तथ्याङ्कमा देखिएको छ । यसमा पनि पुरुषको तुलनामा महिला आवेदक बढी अर्थात् ५३.९ प्रतिशत रहेका छन् ।

आवेदकमध्ये झण्डै ६० प्रतिशतभन्दा बढि व्यक्ति यूरोपमा बसोबास गर्ने गरेका र २९ प्रतिशत इयूभित्रै रहेका प्रतिवेदनमा छ ।

प्रतिक्रिया

सम्बन्धित सामाग्री