सेनाको विमान दुर्घटनामा परेका ८१ जनाको शव भेटियो

याङ्गुन, २९ जेठ । विमान दुर्घटना भएको पाँचौ दिन दुर्घटनामा परी मृत्यु भएका मध्ये सोमबारसम्म ८१ जनाको शव भेटिएकोे रक्षा सेवा कार्यालयका अधिकारीहरुले जानकारी दिएका छन् ।

टानिन्थारीको दक्षिणी सामुद्रिक किनारामा पर्ने माउङमाकानबाट पछिल्लो समय थप पाँच ओटा शव भेटिएको हो ।

विमान दुर्घटना भएको घटनास्थलमा सोमबार पनि लगातार खोजी गरिएको थियो । खोजीका लागि नौ पानी जहाज, पाँच सैनिक विमान र दुई हेलिकोप्टर सहित स्थानीय सहयोगीहरु परिचालन भएका छन् ।

गत बुधबार १२२ जना यात्रु सहित मिइकीबाट उडेको जहाज दुर्घटनामा परेको हो । विमानमा भएका मध्ये १०८ जना सेना र तिनीहरुका पारिवारिक सदस्य र १४ जना चालक दलका सदस्य रहेका थिए । यस दुखद् घटनाको अनुसन्धान भइरहेको सरकारी अधिकारीहरुले जानकारी दिएका छन् ।