डेनमार्कमा नेपाल एक्सपो तयारी


लन्डन । डेनमार्क र नेपालबीच दौत्य सम्बन्धको स्वर्ण जयन्ती मनाउने सिलसिलामा डेनमार्कमा ‘नेपाल एक्सपो’ को तयारी अन्तिम चरणमा छ । १६ देखि १८ जुनसम्म हुने उक्त एक्सपोमा नेपाली उत्पादन तथा हस्तकला सामाग्री प्रदर्शन हुने आयोजक नेपाल हाउस कोअपरेटिभ लिमिटेड डेनमार्कले जनाएको छ ।

नेपाल हाउसका संस्थापक तथा प्रमुख कार्यकारी अधिकृत पूर्ण बन्धनले डेनिस क्रेताहरुलाई एक्सपोसम्म पुरयाउने रणनीति अनुरुप डेनिस सेलेब्रेटी सिंगरहरु वाफण्डे र स्टीग मोलरका साथ प्रख्यात डिजे मास्टर फ्याटम्यान समेत सहभागी हुने जनाए ।

मेलामा डेनिस र नेपाली व्यापारीबीच नियमित व्यावसायिक सम्पर्क स्थापित गराउने हेतुले ‘लाइक नेभर बिफोर’ नामक कोअपरेटिभ विजनेस सेमिनार समेत गर्न लागिएको छ । उक्त सेमिनार एक्सपो सकिएको भोलिपल्ट 
ड्यान होस्टेल सभाकक्षमा हुनेछ । सेमिनारमा आउने व्यवसायीहरुको मनोबल बढाउन र डेनिस व्यवसायीहरूलाई नेपालबारे यथेष्ट जानकारी दिन युरोपकै एकमात्र सगरमाथा आरोही महिला तथा प्रख्यात उत्प्रेरक वक्ता लिने गामलगोर्डले विजनेस सेमिनारको नेतृत्व गर्ने बताइएको छ ।

एक्सपोमा स्थानीय नेपाली कलाकारहरुले लोक तथा आधुनिक नृत्य, चलचित्र गीत गायन, नेपाली शास्त्रीय नृत्य, सुदुरपश्चिमेली हुड्के र छलिया, मौन सडक नाटक, लाखे नृत्य इत्यादि प्रस्तुत गरिने जनाउंदै बन्धनले सुदुरपश्चिमको थारु समुदायका पहिरन लगायत नेपालका प्रमुख जनजातीका पोशाक संलग्न इथ्नीक फेशन सो हुने जानकारी दिए ।

एक्सपोमा रिदम र बिट अनुरुप लोकबाजा बजाउन माहिर प्रख्यात नेपाली पप गायक दीपक बज्राचार्यको क्रिम अफ रिदमको विशेष प्रस्तुति हुने आयोजकले जनाएका छन् । बज्राचार्यको ब्याण्ड सदस्यहरुलाई तीन वर्षका लागि ब्राण्ड एम्बासडरका रुपमा नियुक्त गरिएको छ ।

एक्सपोमा सहभागी हुन आउने उत्पादक तथा पर्यटन सेवा विक्रेता कम्पनीहरुका साथ दीर्घकालिन सम्झौता गरि नेपाल हाउस अनलाइन सुपर मार्केटका माध्यमबाट स्क्यानडेनिभियन क्षेत्रमा नेपाली वस्तु तथा सेवाहरुको विक्री सुपथ र सहज बनाउने योजना रहेको नेपाल हाउसका परिकल्पनार पूर्ण बन्धनले बताए । डेनमार्कमा नेपालका वस्तु विक्री तथा सेवा दिइरहेका एसियन मुलका व्यापारीबीच समन्वय होस् भन्ने हेतुले नेपाल हाउसले नै हरेक वर्ष ‘एसियन एक्सपो’ गर्ने जानकारी समेत बन्धनले दिए ।

प्रतिक्रिया

सम्बन्धित सामाग्री