लन्डन । २२ जनाको ज्यान जाने गरि म्यानचेस्टरमा भएको आत्मघाती आक्रमणको दुई साता नपुग्दै लन्डनमा फेरि आतंकवादी आक्रमण भएको छ । मेट्रोपोलिटन प्रहरीका अनुसार शनिबार राती लन्डनको मुटु लन्डन ब्रीज र बरो मार्केटमा गम्भीर प्रकृतिको आतंकवादी आक्रमण भएको हो । आक्रमणमा कम्तीमा ७ जनाको मृत्यु भएको छ भने प्रहरीले ३ आतंककारीलाई गोली हानी मारिदिएको छ । ४८ घाइतेहरुलाई उपचारार्थ विभिन्न अस्पतालमा लगिएको छ ।
बीबीसी संवाददाता होली जोन्सले लन्डन ब्रीजमा एउटा भ्यान करिब ५० माइलको गतिमा पैदल यात्रु माथि कुदाइएको देखेका थिए । सोही भ्यानबाट ओर्लेर ३ जनाले लन्डनब्रीज नजिक रहेको बरो मार्केटस्थित पब र रेष्टुरेन्टमा समेत छुरा प्रहार गरेको बेलायती सञ्चार माध्यमले जनाएका छन् ।
घट्नास्थलमा सशस्त्र प्रहरी, प्रतिआतंकवाद अधिकारी, एम्बुलेन्स र प्रहरीका गाडीको उल्लेख्य उपस्थिति छ ।
यस घट्नाबारे प्रधानमन्त्री टेरेजा मे सचेत रहेको र उनले घट्नालाई सम्भावित आतंकवादीका रुपमा लिइएको जनाएकी छन् । विपक्षी लेबोर पार्टीका नेता जेरेमी कोर्बीनले घट्नालाई क्रुर र आश्चर्यचकित भनेका छन् ।
