इलाम समाज बेलायतको चौथो अधिवेशन सम्पन्न  

लण्डन । इलाम समाज बेलायतको चौथो अधिवेशनले गोपाल गिरीको अध्यक्षतामा नयाँ कार्यसमिति गठन गरेको छ । नव निर्वाचित कार्यसमितिको उपाध्यक्षमा प्रमिला लाबुङ राई र कृष्ण देवान, महासचिव टेक लोक्ताम, सहसचिव रश्मी पराजुली कटुवाल, कोषाध्यक्ष टेकबीर राई, सह-कोषाध्यक्ष उमाकान्त गुरुङ, प्रमुख संयोजक शंकर राई, खेलकुद संयोजक ईन्द्रबहादुर राई, खेलकुद सह-संयोजक लीला गुरुङ, कला साहित्य संयोजक चोक गुरुङ, पब्लिक रिलेशन एवं मिडिया सुमित्रा राई र वेब ब्यवस्थापक मुकेश राई चयन भएका छन् ।

इलाम समाजका करिब १४० सदस्य उपस्थित उक्त कार्यक्रम १२ बजे शुरु भएको थियो । पहिलो चरणमा नवौँ साधारणसभा गरिएको थियो जसमा पूर्व कार्यसमितिले गरेका विभिन्न कार्यमाथि छलफल गरिएको थियो । यसै क्रममा महासचिव मुकेश राईले वार्षिक प्रतिवेदन पेश गरेका थिए । कोषाध्यक्ष कृष्ण देवानले आर्थिक प्रतिवेदन तथा अध्यक्ष कमल राईले अन्य विषयमा बोल्दै कार्यसमिति सफल रहेको र यस पछाडि सम्पूर्ण कार्यसमिति र संस्थाका सदस्यहरुको सदभावपूर्ण सहयोगप्रति आभार ब्यक्त गरेका थिए । आगामी दिनमा नव कार्यसमितिले अझ सशक्त ढंगले संस्थालाई अगाडि बढाउनेमा आफू विस्वस्त रहेको राईले अभिब्यक्ति दिएका थिए । त्यसपछि उक्त साधारण सभा समापनसंगै कार्यसमिति खारेज गर्दै निर्वाचन संयोजक रमेश गुरुङलाई निर्वाचनका निम्ति अधिकार दिइएको थियो ।

रमेश गुरुङको संयोजकत्वमा रहेको निर्वाचन टिमले अध्यक्ष पदका निम्ति दुई उम्मेद्वार दावेदार रहेपछि चुनाव गर्नु परेको थियो । जसमा गोपाल गिरीले आफ्ना प्रतिद्वन्दी कृष्णबीर तामाङलाई बहुमतले पराजित गर्दै अध्यक्ष पद जिते भने अन्य पदमा निर्विरोध निर्वाचित भएको निर्वाचन प्रमुख संयोजकले घोषणा गरेका थिए । निर्वाचन संयोजक रमेश गुरुङले नव गठित कार्यसमितिको घोषणापश्चात हार्दिक बधाई एव सफल कार्यकालको शुभकामना दिए । त्यसपश्चात संस्थाका सल्लाहकार कमल राईले नव निर्वाचित कार्यसमितिका अध्यक्ष एव सम्पूर्ण पदाधिकारीहरुलाई खादा ओडाई सम्मान र बधाई दिएका थिए ।

नवनियुक्त अध्यक्ष गिरीले आगामी दिनमा संस्थाका निम्ति अझ सशक्त ढंगले काम गर्ने प्रतिवद्धता जाहेर गर्दै बेलायतका विभिन्न स्थानमा छरिएर रहेका सम्पूर्ण इलामेहरुलाई एकवद्ध गर्ने बताए । आफूले संस्थाको कार्यसमितिमा लामो समयदेखि अन्य पदमा रहेर काम गरेको र पूर्व कार्यसमितिमा उपाध्यक्ष पदमा रहेर काम गर्दा महसुस गरेको कमी कमजोरीहरुलाई हटाएर आफ्नो अनुभव सवल रुपले प्रस्तुत गर्ने जनाए । साथै उनले पूर्व कार्यसमितिले संस्थाको हकहितको निम्ति बनाएको रणनीति र कार्ययोजनाहरुलाई अझै परिमार्जित् गर्दै पूरा गर्ने र निर्माणाधिन ‘डकुमेन्ट्री’ प्रोजेक्ट सफलतापूर्वक पूरा गरी इलामको पहिचानको रुपमा सार्वजनिक गर्ने प्रतिवद्धता पनि जाहेर गरे ।

समाजको नवौ साधारण सभा र चौथो अधिवेशन भब्य-सभ्य रुपमा करिव साँझ ८ बजे समापन भएको आयोजकले बताएका छन् ।