५७ प्रतिशत मत ल्याई रुहानी पुनः इरानको राष्ट्रपति

तस्विरः सिन्हवा

तेहरान (इरान), ६ जेठ । इरानमा शुक्रबार भएको राष्ट्रपति निर्वाचनबाट ५७ प्रतिशत मत प्राप्त गरी वर्तमान राष्ट्रपति हसन रुहानी नयाँ कार्यकालका लागि निर्वाचित हुनुभएको यहाँका गृहमन्त्री अब्दोलरेजा रहमानी फजलीले शनिबार बताउनुभएको छ ।

शुक्रबार भएको निर्वाचनमा खसेका चार करोड १२ लाख २० हजार १३१ मतमा रुहानीले दुई करोड ३५ लाख ४९ हजार ६१६ अर्थात् ५७ प्रतिशत मत प्राप्त गर्नुभएको फजलीले बताउनुभयो । गणना भएको मत सङ्ख्या खसेको सम्पूर्ण मत सङ्ख्याको ९९.७ प्रतिशत हो ।

रुहानीका निकटतम प्रतिद्वन्द्वी इब्राँहिम राइजीले एक करोड ५७ लाख ८६ हजार ४४९ अर्थात् ३८.५ प्रतिशत मत प्राप्त गर्नुभएको गृहमन्त्रीले जानकारी गराउनुभयो ।

इरानको कानुनअनुसार मत नतिजामा चित्त नबुझेमा तीन दिनभित्र उजुरी इरानको ‘गार्जियन काउन्सिल अफ कन्सटिच्युसन’ मा दर्ता गर्न सक्ने प्रावधान छ ।

राज्यको केन्द्रिय व्यवस्थापिका भएका नाताले काउन्सिलले राष्ट्रपतीय निर्वाचनमाथि उठाइने उजुरमाथि विचार गरी नतिजालाई पुष्टि (सदर वा बदर) गर्ने यहाँको कानुनी प्रावधान छ ।

शनिबार इरानका सर्वोच्च नेता आयतोल्लाह अलि खामेनीले रुहानीको पक्षमा विशाल जनसमर्थन मतदानमार्फत गरेकामा इरानी जनतालाई धन्यवाद ज्ञापन गर्नुभएको छ ।

इरानमा राष्ट्रपतिको छनौटका लागि शुक्रबार मतदान भएको थियो । इरानी सर्वोच्च नेता आयातोल्लाह अलि खामेनीले नयाँ राष्ट्रपति छनौट गर्ने निर्वाचनमा स्थानीय समयअनुसार शुक्रबार बिहान ८ बजे मत गर्दै सम्पूर्ण इरानी जनतालाई समयमै मतदान केन्द्रमा पुगी आफ्नो मताधिकारको सदुपयोग गर्न आग्रह गर्नुभएको थियो ।

“इस्लामिक गणतन्त्र इरानमा राष्ट्रपतिको निर्वाचनलाई विशेष महत्व दिइन्छ र इरानी जनताले यो सन्देशलाई ध्यानपूर्वक लिनेछन्,” इरानी टेलिभिजनको प्रत्यक्ष प्रसारणमा खामेनीले भन्नुभयो । उक्त अवसरमा उहाँले निर्वाचन प्रजातन्त्रको आधार भएको बताउनुभयो ।

पाँच करोड ६० लाख इरानी नागरिकले आफ्नो मताधिकार प्रयोग गर्दै आगामी चार वर्षका लागि नयाँ नेतृत्व चयन गरेका हुन् ।

बिहीबार इरानका गृहमन्त्रीले राष्ट्रपतिको दौडमा रौहानी, इबाहीम राइजी, मोस्तफा अघामिर्सालिम र मोस्तफा हसेमी तावा रहेको औपचारिक घोषणा गर्नुभएको थियो ।

राष्ट्रपतिको निर्वाचनमा उम्मेदवार बन्न चाहेका एक हजार ६३६ जनाले गत अप्रिल २१ मा निवेदन दिएको भए पनि छ जना मात्र राष्ट्रपतिको उम्मेदवारका रुपमा प्रतिस्पर्धा गर्न योग्य मानिएका हुन् ।

गत मङ्गलबार सुधारवादी उपराष्ट्रपति इशाक जहाङगिरीले आफूले राष्ट्रपतिको निर्वाचन उम्मेदवारी फिर्ता लिएको जनाउनुभएको थियो ।

मोदीद्वारा रुहानीलाई बधाई

नयाँदिल्ली (भारत), ६ जेठ । भारतीय प्रधानमन्त्री नरेन्द्र मोदीले शनिबार इरानको राष्ट्रपतिमा पुनः निर्वाचित हसन रुहानीलाई बधाई ज्ञापन गर्दै उहाँको सफल कार्यकालको शुभकामना दिनुभएको सरकारका प्रवक्ताले बताएका छन् ।

भारतीय प्रधानमन्त्री मोदीले शनिबार एक विज्ञप्ति जारी गर्दै भन्नुभएको छ, “मेरो साथी रुहानीलाई हृदयदेखि बधाई छ ।” “नयाँ कार्यकालमा इरानले रुहानीको सक्रिय नेतृत्वले नयाँ सफलता चुम्नेछ ।”

रुहानी शनिबार इरानी राष्ट्रपति निर्वाचित हुनुभएको हो । राष्ट्रपतिमा पुनः विजय हासिल गरेपछि रुहानीले निर्वाचन पूर्व र निर्वाचनका समय गरेका बाचा पूरा गर्न दृढसङ्कल्प रहने बताउनुभएको छ ।

भारतीय प्रधानमन्त्री मोदीले आगामी दिनमा भारत–इरानबीचको सम्बन्ध थप प्रगाढ पार्न भारतको तर्फबाट आफू प्रतिबद्ध रहेको जनाउनुभएको छ ।