पत्रकारहरुको च्यारिटीमा लोकगायक गर्बुजा आउने तय, तयारी तीव्र

लन्डन । नेपाल पत्रकार महासंघ बेलायतले यही २१ मेमा गर्न लागेको च्यारिटी डिनरमा नेपालका एकजना लोकप्रिय गायक खड्ग गर्बुजा सहभागी हुने भएका छन् । महासंघले उनको भिजा लागिसकेको जनाएको छ । एम्पायर हल अल्डरसटमा हुने कार्यक्रममा गर्बुजा अलवा स्थानीय कलाकारहरुबाट समेत प्रस्तुति हुने अपेक्षा छ । कार्यक्रम पटयारलाग्दो सट्टा मनोरन्जनात्मक बनाउन शाखा जुटिरहेको छ ।
एउटा आपतकालिन कोष स्थापना गर्ने उद्देश्यले गर्न लागिएको उक्त च्यारिटीका लागि यतिखेर तीव्र तयारी छ । महासंघ शाखाका अध्यक्ष नरेश खपांगीमगरले कार्यक्रमका लागि उत्साहजनक सहभागिता हुने प्रतिद्धता आएको जनाउंदै सबैमा सहभागी भइदिन र आर्थिक सहयोग गर्न अपिल गरेका छन् ।

‘हामीले यसअघि धेरै संघसंस्था र व्यक्तिको कार्यक्रम सफल बनाउन महत्वपूर्ण भूमिका निर्वाह गर्यौं । यसपटक हामीले समस्त समुदायबाट सहयोग अपेक्षा गरेका छौं’, उनले भने । उनले हालसम्म तीसवटा टेबल बुक भइसकेको र करिब ४ हजार पाउण्ड प्रतिवद्धता आइसकेको जनाए।

अहिले च्यारिटीका लागि ‘मोमेन्टम’ बनेकामा दंग छन् कार्यक्रम संयोजक दूत पुन । बेलायतमा भइरहने च्यारिटीभन्दा पृथक कार्यक्रम गर्ने उनको दृढता छ ।