मंगलबार, असोज ६ २०७७ | Tue, September 22, 2020
नेपालको समय: २३:२७ | UK Time: 18:42

एनबिसीसित ह्यारो वेष्टका सांसदले गरे छलफल

वीनेपाली
२०७४ वैशाख २० गते २१:४९

लण्डन । लण्डनको उत्तर पश्चिमी क्षेत्र ह्यारो वेष्टका सांसद तथा आसन्न संसदीय निर्वाचनमा लेबोर पार्टीका उम्मेदवार ग्यारेथ थोमसले स्थानीय नेपालीसित भेटी उनीहरुका समस्याका बारेमा छलफल गरेका छन् ।
उनले बुधबार स्थानीय नेपलिज ब्रिटिश कम्युनिटी (एनबीसी) युकेको प्रतिनिधि मण्डलसित भेटघाट गरेका छन् ।

कम्युनिटीका अध्यक्ष मिलन घिमिरेको निवासमा भएको छलफलमा कम्युनिटीका प्रतिनिधिले सो क्षेत्रमा बसोबास गर्ने वृद्ध गोरखाहरुलाई दिउँसो हेरचाहका लागि सेवा उपलब्ध गराउनुपर्ने माग गरेका थिए । यस्तै, सो क्षेत्रमा ग्रामर स्कुल नहुँदा अभिभावकहरु अन्यत्र सर्न परिरहेकोले सो क्षेत्रमा ग्रामर स्कुलका लागि पहल गर्न पनि आग्रह गरेका थिए ।

कम्युनिटीले बालबालिकालाई नेपाली भाषा र बृद्धबृद्धालाई अंग्रेजी भाषा कक्षा सिकाइरहेको, बेलायती समाजमा अन्तरघुलन हुनका लागि काम गरिरहेको उल्लेख गर्दै एनबीसी टोलीले संस्थालाई आर्थिक रुपमा र कार्यालय स्थापनाका लागि सहयोग गर्न पनि प्रस्ताव गरेका थिए ।

भेटघाट करिब एक घण्टा चलेको थियो । आगामी महिना हुने निर्वाचनलाई मध्यनजर गरी संसदीय उम्मेदवारहरुले नेपाली समुदायलाई पनि भेट्न शुरु गरेका छन् ।

प्रतिक्रिया

सम्बन्धित सामाग्री

फेसबुक