बेलायत एमालेमा नयां नेतृत्वका लागि दौडधुप

लन्डन । एमाले निकट प्रवासी नेपाली मञ्च यूकेको नयां नेतृत्वका आंकाक्षीहरु भित्री तयारीमा लागेका छन् । वर्तमान अध्यक्ष रामशरण सिम्खडाको कार्यकाल यही जुन महिनामा सकिने भएपछि नयां नेतृत्वका लागि दौडधुप शुरु भएको हो ।

आइतबार लन्डनमा बसेको मञ्चको जिल्ला कमिटी बैठकले यही जुन २५ मा चौंथो अधिवेशन गर्ने निर्णय गरेको थियो । सो निर्णयपछि आफूलाई नयां नेतृत्व रुपमा उभ्याउन भित्री तयारी शुरु भएको छ । औपचारिक रुपमा कसैले अध्यक्षका लागि दावी नगरेपनि प्रवासी नेपाली मञ्च यूकेका सल्लाहकार राजेन्द्र पुडासैनी, उपाध्यक्षद्धय रवीन्द्र कंडेल, रामजी बराल र महासचिव तुङगभद्र भुसालवीच प्रतिस्पर्धा हुने देखिएको छ । यद्यपि उनीहरुले वीनेपालीसंग भने, ‘सर्वसम्मत नेतृत्वका लागि पहल गरिनेछ ।’ पुडासैनीले नेतृत्व दावीका लागि सल्लाह सुझाव लिइरहेका छन् ।

यता, तीन वर्ष ४ महिना काम गर्ने अवसर दिएकोमा धन्यवाद दिदै अध्यक्ष सिम्खडाले यही मे अन्तिम सम्ममा सदस्यता नवीकरणका लागि आग्रह गरेका छन् ।

अध्यक्ष सिम्खडाले संगठन हांक्न सक्ने, वैचारिक रुपमा प्रस्ट र जुझारु, संगठनका लागि समय दिन सक्ने तथा गुटगत राजनीतिबाट संगठनलाई टाढा राख्न सक्ने नेतृत्वलाई पद हस्तान्तरण गर्न आफू आतुर रहेको बताए । उनका अनुसार, पक्ष- विपक्ष र गुट-उपगुटतिर नलागि स्वतन्त्र रुपमा अधिवेशन गराइने 
छ ।