लन्डन । सन् १९५१ देखि संरक्षित इंग्ल्याण्डको उत्तर पश्चिम क्षेत्रमा अवस्थित लेक डिस्ट्रिक्ट राष्ट्रिय निकुन्ज ८८५ स्क्वायर माइलमा फैलिएको छ । समर शुरु हुंदै गर्दा ब्रिटेनको एउटा आकर्षक पर्यटकीय स्थल ‘लेक डिस्ट्रिक्ट’ विश्वभरका पर्यटकले भरिन्छ । तर, शनिबार भिन्न स्वरुपमा देखियो उक्त क्षेत्र ।
लेक डिस्ट्रिक्टका तीन चुचुरामा सयौं स्वयंसेवक एकत्रित थिए । ब्यारो, स्टाइल इण्ड र आउटर साइड चुचुरामा करिब ७ सय स्वयंसेवक उकालो चढ्न तत्पर भइरहंदा सांझ परिसकेको थियो । इभेन्ट फोटोग्राफरहरु कारमेन नोर्मन, टोम म्याकनेली र निक ल्याण्डेल्स्ले त्यो भीडमा बलिरहेको प्रकाश क्यामेरामा कैद गरिहाले । स्वयंसेवकले बालेका टर्चले नेपालको झण्डा आकृति दर्शाइरहेको थियो । ति स्वयंसेवक नेपालको भूकम्प पीडितलाई आर्थिक सहयोग जुटाउन तल्लिन देखिन्थे ।
तेश्रो ‘लेक ल्याण्ड फेस्टिबल अफ लाइट’ बाट नेपालका भूकम्प पीडितलाई दश हजार पाउण्ड उठाइएको लेकल्याण्ड माउन्टेन गाइड तथा कार्यक्रम आयोजक म्याट लि भोइले जनाए । ‘चुचुरोमा विभिन्न रंगले नेपाली झण्डा प्रतिनिधित्व गर्दा सांच्चिकै रमणीय देखिएको थियो’, म्याटले सुनाए, ‘कार्यक्रम सोचेभन्दा सफल भयो । अब फेज वल्डवाइड नामक च्यारिटी मार्फत भूकम्प पीडितलाई रकम पठाउने हाम्रो योजना छ ।’ म्याटले आगामी वर्ष पनि यस्तो कार्यक्रमलाई निरन्तरता दिइने बताए ।
कार्यक्रमले भविष्यमा बेलायतबाट नेपालका लागि थप सहयोग जुटाउन प्रेरित गर्ने अपेक्षा छ ।
गत वर्ष यस्तै प्रकृतिको कार्यक्रम गरेर ११ हजार पाउण्ड संकलन गरिएको थियो । गत वर्षको क्याटबेल्स् फेस्टिबल अफ लाइटमा करिब ५ सय सहभागी थिए ।
भूकम्पपछि बेलायतबाट जनस्तरमा आर्थिक सहयोग जुटाउने क्रम निरन्तर छ । बेलायत सरकारले भूकम्पपछि नेपालमा राहत तथा पुनर्निर्माणमा १४ करोड पाउण्ड सहयोग गरेको छ ।
